ایران جنگ میں پاکستان کا کردار قیامت تک یاد رکھا جائے گا، خواجہ آصف کا بڑا بیان

سیالکوٹ: وزیر دفاع خواجہ آصف نے کہا ہے کہ ایران جنگ کے دوران پاکستان نے جو کردار ادا کیا، وہ تاریخ میں ہمیشہ یاد رکھا جائے گا اور اسے قیامت تک فراموش نہیں کیا جا سکے گا۔

سیالکوٹ میں میڈیا سے گفتگو کرتے ہوئے خواجہ آصف نے کہا کہ یومِ عاشور ایسے وقت میں آیا جب خطے میں جنگ کی صورتحال موجود تھی۔ انہوں نے کہا کہ ایرانی قوم نے حضرت امام حسینؓ اور شہدائے کربلا کی قربانیوں کی یاد تازہ کرتے ہوئے صبر، استقامت اور حوصلے کی مثال قائم کی۔

وزیر دفاع کا کہنا تھا کہ ایران جنگ میں پاکستان نے ذمہ دارانہ اور مثبت سفارتی کردار ادا کیا۔ ان کے مطابق پاکستان نے دونوں ممالک کے درمیان صلح کرانے کی کوشش کی، جس کے باعث ملک پوری امت مسلمہ کے سامنے سرخرو ہوا۔

خواجہ آصف نے مزید کہا کہ لبنان بھی اسرائیلی ظلم و ستم سے نجات حاصل کرے گا۔ انہوں نے دعا کی کہ دنیا بھر میں جہاں کہیں بھی مسلمان ظلم و جبر کا شکار ہیں، اللہ تعالیٰ انہیں آزادی، امن اور استحکام نصیب فرمائے۔

وزیر دفاع کے بیان پر مختلف حلقوں کی جانب سے تبصرے سامنے آ رہے ہیں، جبکہ پاکستان کے سفارتی کردار پر بھی بحث جاری ہے۔