پاکستان امن چاہتا ہے، بھارت دوبارہ حملے کی جرات نہیں کرے گا خواجہ آصف

میڈیا سے گفتگو کرتے ہوئے خواجہ آصف کا کہنا تھا کہ ایک سال قبل جس طرح بھارت کو شکست کا سامنا کرنا پڑا، اس کے تکبر کو پاک افواج نے خاک میں ملا دیا، جس کے بعد اب بھارت دوبارہ پاکستان پر حملہ کرنے کی ہمت نہیں کرے گا۔

انہوں نے کہا کہ پاکستان ایک ذمہ دار ریاست کے طور پر خطے میں اچھے ہمسائے کا کردار ادا کرنا چاہتا ہے، تاہم بھارت کی جانب سے پراکسی جنگ جاری ہے۔ ان کا کہنا تھا کہ بھارت افغانستان کے ذریعے پراکسی وار میں ملوث ہے اور بعض عناصر کو سپورٹ فراہم کی جا رہی ہے، جس کے باعث سیکیورٹی چیلنجز برقرار ہیں۔

وزیر دفاع نے پاکستانی افواج کے کردار کو سراہتے ہوئے کہا کہ مسلح افواج نے ملک کے دفاع میں مثالی خدمات انجام دی ہیں اور اپنی قربانیوں سے قوم کو تحفظ فراہم کیا ہے۔ انہوں نے کہا کہ قوم کو بھی ذاتی مفادات سے بالاتر ہو کر قومی مفاد کو ترجیح دینا ہوگی۔

خواجہ آصف نے کہا کہ افواج نے گلگت بلتستان سے لے کر کراچی اور گوادر تک ملک کے ہر حصے کا دفاع کیا ہے، جبکہ سرحدوں پر تعینات جوان اپنی جانوں کا نذرانہ پیش کر کے وطن کی حفاظت کر رہے ہیں۔

انہوں نے اس عزم کا اظہار کیا کہ پاکستان کا مفاد ہر چیز سے مقدم ہے اور ملکی سلامتی پر کسی قسم کا سمجھوتہ نہیں کیا جائے گا۔