امریکی ریاست میری لینڈ میں عقیدت و محبت کی روح پرور محفل

(وڈلان / میری لینڈ / محمد نعیم اختر) محفل میں حضرت علامہ رضا الدین صدیقی صاحبؒ کی دینی، روحانی اور اصلاحی خدمات کو زبردست خراجِ عقیدت پیش کیا گیا۔تقریب کی میزبانی مسجد الکرم وڈلان کے امام و خطیب حضرت مولانا طارق محمود جامعی صاحب نے کی۔ اپنے خطاب میں انہوں نے کہا کہ حضرت علامہ رضا الدین صدیقی صاحبؒ نے پوری زندگی عشقِ رسول ﷺ، سنتِ نبوی ﷺ اور دینِ اسلام کی خدمت میں گزاری۔ انہوں نے نوجوان نسل کی اسلامی تربیت کو وقت کی اہم ضرورت قرار دیتے ہوئے ماؤں اور خواتین کے کردار کو انتہائی اہمیت کا حامل بتایا۔

محفل کا آغاز تلاوتِ کلامِ پاک اور نعتِ رسولِ مقبول ﷺ سے ہوا، جبکہ مختلف علماء کرام نے حضرت علامہ رضا الدین صدیقی صاحبؒ کی سادگی، تقویٰ، اخلاص اور دین کے لیے خدمات پر روشنی ڈالی۔ مقررین نے اتحادِ امت، محبت اور اسلامی اقدار کو فروغ دینے کی ضرورت پر بھی زور دیا۔

تقریب میں مفتی سجاد رضا مدنی صاحب، مفتی محمد یاسین چشتی صاحب، علامہ انوار الحق علوی الہاشمی صاحب، علامہ عمر حیدر چیمہ، قاری رافع احمد بٹ اور دیگر علماء و مشائخ نے خصوصی شرکت کی، جبکہ متعدد معزز سماجی و سیاسی شخصیات بھی شریک ہوئیں۔

پروگرام کے اختتام پر حضرت علامہ رضا الدین صدیقی صاحبؒ کے درجات کی بلندی، امتِ مسلمہ کے اتحاد، عالمِ اسلام کی سلامتی اور ملکی خوشحالی کے لیے خصوصی دعا کی گئی۔