محسن نقوی کی تہران میں عباس عراقچی سے اہم ملاقات، ایران امریکا معاہدے اور خطے کی صورتحال پر تفصیلی گفتگو

(تہران) وفاقی وزیر داخلہ محسن نقوی نے ایران کے دارالحکومت تہران میں ایرانی وزیر خارجہ عباس عراقچی سے اہم ملاقات کی، جس میں ایران اور امریکا کے درمیان حالیہ معاہدے کے بعد خطے کی مجموعی صورتحال، امن و استحکام اور آئندہ سفارتی پیش رفت پر تفصیلی تبادلہ خیال کیا گیا۔

وزارت داخلہ کی جانب سے جاری اعلامیے کے مطابق محسن نقوی کی ایران آمد پر ایرانی وزیر داخلہ سکندر مومنی نے ان کا پرتپاک استقبال کیا۔ بعد ازاں دونوں وزرائے داخلہ کے درمیان ملاقات ہوئی جس میں علاقائی امن و امان، سرحدی تعاون اور سکیورٹی امور پر گفتگو کی گئی۔

ملاقات کے دوران دونوں ممالک کے رہنماؤں نے ایران اور امریکا کے درمیان طے پانے والے حالیہ معاہدے کو خطے میں پائیدار امن اور کشیدگی میں کمی کی جانب ایک مثبت پیش رفت قرار دیا۔ فریقین نے اس امید کا اظہار کیا کہ معاہدے کے مؤثر نفاذ سے مشرقِ وسطیٰ میں استحکام کو فروغ ملے گا۔

رپورٹس کے مطابق ایران کے چیف مذاکرات کار اور وزیر خارجہ عباس عراقچی آج رات سوئٹزرلینڈ روانہ ہوں گے، جہاں وہ معاہدے کے دوسرے فریق کے نمائندوں سے ملاقات کریں گے۔ ذرائع کا کہنا ہے کہ وفاقی وزیر داخلہ محسن نقوی بھی اس اہم دورے میں ان کے ہمراہ ہوں گے۔

ایران کی وزارت خارجہ کے ترجمان کے مطابق سوئٹزرلینڈ میں ہونے والی ملاقات کا مقصد معاہدے پر عمل درآمد کا جائزہ لینا اور دوسرے فریق کی سنجیدگی کو پرکھنا ہے۔ ایرانی وفد معاہدے کے تحت کیے گئے وعدوں پر مکمل عمل درآمد کا مطالبہ کرے گا اور ایران کے مؤقف کو واضح انداز میں پیش کرے گا۔

تجزیہ کاروں کے مطابق سوئٹزرلینڈ میں ہونے والا یہ دورہ اور مذاکرات خطے میں جاری سفارتی سرگرمیوں کے تناظر میں غیر معمولی اہمیت کے حامل ہیں اور ان کے نتائج مستقبل کی علاقائی سیاست پر گہرے اثرات مرتب کر سکتے ہیں۔