اسلام آباد کے ریڈ زون کو سیل کرنے کا عمل جاری، کنٹینرز ویلڈ کرکے رکاوٹیں مزید مضبوط

اسلام آباد: وفاقی دارالحکومت میں ممکنہ احتجاجی مارچ اور دھرنوں کے پیش نظر ریڈ زون کی سکیورٹی سخت کرنے کا عمل جاری ہے۔ مختلف مقامات پر کنٹینرز لگا کر راستوں کو بند کیا جا رہا ہے، جبکہ انہیں آپس میں ویلڈ کرکے مزید مضبوط کیا جا رہا ہے۔

ذرائع کے مطابق اسلام آباد کے سرینا چوک سمیت مختلف مقامات پر کنٹینرز رکھ کر داخلی و خارجی راستوں پر رکاوٹیں قائم کی جا رہی ہیں۔ کنٹینرز کو ایک دوسرے کے ساتھ جوڑنے کے لیے لوہے کی سلاخیں اور پتریاں استعمال کرتے ہوئے ویلڈنگ کی جا رہی ہے۔

ذرائع کا کہنا ہے کہ کنٹینرز کو ویلڈ کرنے کا مقصد انہیں اپنی جگہ سے ہٹانا مشکل بنانا ہے۔ ریڈ زون کے اطراف کنٹینرز کی دیواریں قائم کرنے کے بعد ان کے پیچھے مزید کنٹینرز بھی رکھے جا رہے ہیں۔

سرینا چوک پر بھی کنٹینرز کو باقاعدہ طور پر آپس میں جوڑ کر ویلڈ کیا جا رہا ہے تاکہ ممکنہ احتجاجی مارچ یا دھرنے کی صورت میں سکیورٹی انتظامات کو مزید مضبوط رکھا جا سکے۔

وفاقی دارالحکومت میں ممکنہ احتجاج کے پیش نظر مختلف داخلی و خارجی راستوں پر رکاوٹیں کھڑی کرنے کا سلسلہ جاری ہے، جبکہ ریڈ زون کے اطراف سکیورٹی انتظامات مزید سخت کیے جا رہے ہیں۔