ملک بھر کے 115 اضلاع میں قومی انسدادِ پولیو مہم کا آغاز
ملک بھر کے منتخب 115 اضلاع میں ذیلی قومی انسدادِ پولیو مہم کا آغاز ہوگیا۔ نیشنل ای او سی کے مطابق پانچ سال سے کم عمر 3 کروڑ 10 لاکھ سے زائد بچوں کو پولیو سے بچاؤ کے قطرے پلائے جائیں گے، جبکہ 2 لاکھ 73 ہزار سے زائد پولیو ورکرز مہم میں حصہ لے رہے ہیں۔ پنجاب، سندھ، خیبرپختونخوا، بلوچستان، اسلام آباد اور گلگت بلتستان میں لاکھوں بچوں کو ویکسین پلانے کا ہدف مقرر کیا گیا ہے
اسلام آباد: ملک بھر کے منتخب 115 اضلاع میں آج سے ذیلی قومی انسدادِ پولیو مہم کا آغاز ہوگیا، جس کے دوران پانچ سال سے کم عمر 3 کروڑ 10 لاکھ سے زائد بچوں کو پولیو سے بچاؤ کے قطرے پلائے جائیں گے۔
نیشنل ای او سی کے مطابق مہم میں 2 لاکھ 73 ہزار سے زائد پولیو ورکرز حصہ لے رہے ہیں، جو مختلف علاقوں میں گھر گھر جاکر بچوں کو پولیو ویکسین پلائیں گے۔
پنجاب کے 13 اضلاع میں ایک کروڑ 6 لاکھ، سندھ کے 30 اضلاع میں ایک کروڑ جبکہ خیبرپختونخوا کے 37 اضلاع میں 73 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
اسی طرح بلوچستان کے 32 اضلاع میں 23 لاکھ، اسلام آباد میں 4 لاکھ 47 ہزار جبکہ گلگت بلتستان کے دو اضلاع میں ایک لاکھ 37 ہزار بچوں کو پولیو ویکسین پلائی جائے گی۔
حکام کے مطابق مہم کا مقصد پانچ سال سے کم عمر بچوں کو پولیو جیسے موذی مرض سے محفوظ رکھنا اور ملک سے اس وائرس کے مکمل خاتمے کی کوششوں کو مزید مؤثر بنانا ہے۔
شائع ہوا: 21 ستمبر، 2026 کو 06:23 AM
آخری تدوین: 21 ستمبر، 2026
