پاک امریکہ تعلقات کا نیا دور معاشی شراکت داری پر مبنی ہوگا: سفیر پاکستان

( واشنگٹن/ محمد نعیم اختر ) سفیر پاکستان رضوان سعید شیخ نے کہا سیلکٹ یوایس اے پروگرام کے تحت امریکہ کا دورہ کرنے والی معروف پاکستانی کاروباری شخصیات کے اعزاز میں پاکستان ہاؤس میں منعقدہ عشائیے سے خطاب کرتے ہوئے کیا، جس میں امریکی حکام اور کاروباری شخصیات نے بھی شرکت کی۔

سیلکٹ یوایس اے پروگرام کے تحت پاکستان کی نو بڑی کمپنیوں کے سولہ نمائندگان مختلف شعبہ جات سے امریکہ میں موجود ہیں، جن کے دورے کا مقصد سرمایہ کاری اور معاشی سرگرمیوں کو فروغ دینا ہے۔ سفیر پاکستان نے پاکستان ہاؤس میں مہمانوں اور وفد کا پرتپاک استقبال کیا۔

اپنے خطاب میں رضوان سعید شیخ کا کہنا تھا کہ پاک امریکہ تعلقات کا نیا دور اقتصادی روابط اور طویل المدتی شراکت داری پر مبنی ہوگا۔ انہوں نے کہا کہ دونوں ممالک کے تعلقات ناگزیر ہیں اور پاکستان کی قومی سلامتی پالیسی کا محور جیو اکنامکس ہے۔ انہوں نے پاکستان کی جغرافیائی اور تذویراتی اہمیت کو بھی اجاگر کیا اور کاروباری برادری پر زور دیا کہ وہ دستیاب مواقع سے فائدہ اٹھائیں۔

پال کپور نے کہا کہ ماضی کے اتار چڑھاؤ کے باوجود پاک امریکہ تعلقات ہمیشہ اہم رہے ہیں اور موجودہ دور ان تعلقات کیلئے نہایت اہم ہے۔ ان کا کہنا تھا کہ سلامتی کے ساتھ ساتھ معاشی تعلقات کو کلیدی حیثیت حاصل ہے اور دونوں ممالک کو بطور شراکت دار اقتصادی مواقع سے بھرپور استفادہ کرنا ہوگا۔

امریکی قونصل جنرل چارلس گڈمین نے اپنے خطاب میں عشائیے کے انعقاد پر شکریہ ادا کرتے ہوئے کہا کہ وہ گزشتہ آٹھ ماہ سے پاکستان میں سرمایہ کاری اور تجارت کے فروغ کیلئے کوشاں ہیں۔ انہوں نے کہا کہ سیلکٹ یوایس اے پروگرام پاکستانی کاروباری شخصیات کو امریکی منڈی سے فائدہ اٹھانے کے بہترین مواقع فراہم کرے گا اور یہ دورہ دونوں ممالک کے بڑھتے ہوئے معاشی تعاون کی واضح مثال ہے۔