بالٹی مور میں 14 اگست کی پروقار تقریب، پاکستانی کمیونٹی کا بھرپور جوش و خروش

بالٹی مور، میری لینڈ: امریکی ریاست میری لینڈ کے شہر بالٹی مور میں 14 اگست کے موقع پر پاکستانی کمیونٹی کی جانب سے ایک پروقار تقریب کا انعقاد کیا گیا، تقریب کے دوران پاکستان سے محبت، قومی یکجہتی اور کمیونٹی کے باہمی اتحاد کا بھرپور اظہار کیا گیا۔

تقریب میں پاکستانی ثقافت اور حب الوطنی کے رنگ بھی نمایاں رہے۔ پاکستانی ملی نغموں پر خوبصورت پرفارمنس پیش کی گئی، جبکہ حفصہ صدیقی نے متعدد ملی نغمے پیش کرکے حاضرین کے دل جیت لیے اور تقریب کے ماحول کو وطن سے محبت کے جذبات سے بھر دیا۔

منتظمین نے تقریب کے کامیاب انعقاد میں تعاون کرنے والے اسپانسرز اور شراکت داروں کا خصوصی شکریہ ادا کیا۔ ان میں ICNA Relief، ٹوسن یونیورسٹی کے طلبہ اور مصطفیٰ مصطفائی ہسپتال سے وابستہ تنظیم شامل تھیں، جن کے تعاون کو تقریب کی کامیابی میں اہم قرار دیا گیا۔

تقریب کے منتظمین فضل خلیق، مہر یوسف، اظہر محمود اور عدنان ملک نے تمام معزز مہمانوں، کمیونٹی رہنماؤں، اسپانسرز، طلبہ، خاندانوں اور رضاکاروں کا شکریہ ادا کیا۔ ان کا کہنا تھا کہ کمیونٹی کی اصل طاقت اتحاد، محبت، یکجہتی اور پاکستان سے گہری وابستگی میں ہے۔

تقریب نے بالٹی مور میں مقیم پاکستانی کمیونٹی کو ایک دوسرے کے قریب آنے، اپنی قومی شناخت اور ثقافتی روایات کو اجاگر کرنے اور نئی نسل میں پاکستان سے محبت کے جذبات کو فروغ دینے کا ایک خوبصورت موقع فراہم کیا۔