واشنگٹن میں "ڈپلومیٹک ٹرائیونڈا کپ 2026" کا شاندار انعقاد

( واشنگٹن ) واشنگٹن ڈی سی میں پاکستانی سفارت خانے کے زیرِ اہتمام "ڈپلومیٹک ٹرائیونڈا کپ 2026" فٹبال ٹورنامنٹ کا شاندار انعقاد کیا گیا، جس میں امریکی محکمہ خارجہ، مختلف ممالک کے سفارت کاروں اور فٹبال شائقین کی بڑی تعداد نے شرکت کی

تقریب میں امریکہ میں پاکستان کے سفیر رضوان سعید شیخ اور امریکی اسسٹنٹ سیکریٹری آف اسٹیٹ پال کپور نے خصوصی شرکت کی۔ ٹورنامنٹ میں ڈنمارک، آذربائیجان، کمبوڈیا، سنگاپور، نائجیریا، مصر اور چین کے سفارتی مشنز کی ٹیموں نے حصہ لیا

اس موقع پر سفیر پاکستان رضوان سعید شیخ نے کہا کہ پاکستان ہمیشہ میدانِ جنگ کے بجائے کھیل کے میدانوں کو ترجیح دیتا ہے اور کھیل امن، دوستی اور باہمی احترام کے فروغ کا مؤثر ذریعہ ہیں۔ انہوں نے کہا کہ "ٹرائیونڈا" صرف ایک فٹبال نہیں بلکہ عالمی کھیلوں میں پاکستان کے دیرینہ کردار اور صنعتی مہارت کی علامت ہے

اسسٹنٹ سیکریٹری آف سٹیٹ پال کپور نے فیفا ورلڈ کپ 2026 میں پاکستان کے کردار کو سراہتے ہوئے کہا کہ ہر میچ پاکستانی ساختہ "ٹرائیونڈا" فٹبال سے کھیلا جائے گا اور دنیا بھر کے اربوں شائقین پاکستانی کاریگروں کے ہنر کو دیکھیں گے

تقریب کے اختتام پر سفیر پاکستان نے فاتح ٹیم کو چیمپئن شپ ٹرافی اور شرکاء میں انعامات تقسیم کیے جبکہ پال کپور کو یادگاری تحفے کے طور پر سرکاری "ٹرائیونڈا" فٹبال پیش کی گئی۔ تقریب روایتی پاکستانی کھانوں اور مہمان نوازی کے ساتھ اختتام پذیر ہوئی