امریکی آرمی چیف کو برطرف کر دیا گیا

(واشنگٹن ڈی سی )  امریکی وزیر دفاع پیٹ ہیگزیتھ  نے آرمی چیف آف اسٹاف جنرل رینڈی جارج کو عہدے سے ہٹاتے ہوئے فوری ریٹائرمنٹ لینے کی ہدایت کر دی ہے۔ 

امریکی میڈیا رپورٹ کر رہا ہے کہ وزیر دفاع ایسے رہنما کی تقرری چاہتے ہیں جو صدر ٹرمپ اور ان کے فوجی وژن کو مکمل طور پر نافذ کر سکے۔ پینٹاگون کے ترجمان نے ایک بیان میں کہا کہ جنرل جارج فوری طور پر بطور 41ویں آرمی چیف آف اسٹاف اپنے عہدے سے سبکدوش ہو رہے ہیں اور محکمہ دفاع ان کی طویل خدمات کا معترف ہے۔

امریکی میڈیا کے مطابق مزید دو اعلیٰ فوجی افسران کو بھی ان کے عہدوں سے ہٹا دیا گیا ہے، جن میں جنرل ڈیوڈ ہون اور میجر جنرل ولیم گرین شامل ہیں۔

واضح رہے کہ آرمی چیف آف اسٹاف کی مدت عام طور پر چار سال ہوتی ہے۔ جنرل جارج کو اس عہدے کے لیے سابق صدر جوبائیڈن نے نامزد کیا تھا اور 2023 میں سینیٹ نے ان کی توثیق کی تھی۔