پنکی کے نیٹ ورک میں افریقا کے لوگ بھی ہیں، برانڈ نیم ہی ملزمہ کا پھندا بنے گا: کراچی پولیس چیف

کراچی میں پریس کانفرنس کرتے ہوئے پولیس چیف نے کہا کہ “پنکی کیس” قانون نافذ کرنے والے اداروں کے لیے ایک ٹیسٹ کیس بن چکا ہے اور اسے منطقی انجام تک پہنچایا جائے گا۔ ان کا کہنا تھا کہ ملزمہ کا برانڈ نیم ہی اس کے خلاف اہم ثبوت ثابت ہوگا۔

پولیس کے مطابق تحقیقات کا دائرہ صرف کراچی تک محدود نہیں رکھا گیا بلکہ ان افراد تک بھی رسائی حاصل کی جا رہی ہے جو منشیات خرید کر آگے فروخت کرتے تھے۔ سچل کے علاقے میں ملزمہ کے پرانے گھر پر چھاپے کے دوران مزید منشیات بھی برآمد کی گئی۔

آزاد خان کے مطابق اس نیٹ ورک کے روابط بیرونِ ملک تک پھیلے ہوئے ہیں اور اس میں افریقی ممالک سے تعلق رکھنے والے افراد کے ملوث ہونے کے شواہد بھی سامنے آئے ہیں۔ پولیس نے ملزمہ کے بینک اکاؤنٹس کی تفصیلات بھی حاصل کر لی ہیں، جن میں تقریباً 3 کروڑ روپے کی ٹرانزیکشنز سامنے آئی ہیں۔

پولیس چیف نے مزید بتایا کہ کیس کی تفتیش کے لیےایف آئی اے اور سائبر کرائم ونگ سے بھی رابطہ کیا گیا ہے، جبکہ نیٹ ورک میں شامل تمام افراد کے خلاف کارروائی جاری ہے۔