امریکا اور ایران کے درمیان اگلے 24 گھنٹوں میں امن معاہدے کو حتمی شکل دیے جانے کی توقع: وزیراعظم شہباز شریف

(اسلام آباد) وزیراعظم شہباز شریف نے کہا ہے کہ امریکا اور ایران کے درمیان مجوزہ امن معاہدہ حتمی مراحل میں داخل ہو چکا ہے اور توقع ہے کہ اگلے 24 گھنٹوں کے دوران اس معاہدے کو حتمی شکل دے دی جائے گی۔

سماجی رابطے کی ویب سائٹ پر جاری اپنے بیان میں وزیراعظم نے کہا کہ ایران اور امریکا امن معاہدے کے بہت قریب پہنچ چکے ہیں، جبکہ پاکستان بھی اس پیش رفت میں اپنا سفارتی کردار ادا کر رہا ہے اور معاہدے پر الیکٹرانک دستخط کے انتظامات کی تیاری جاری ہے۔

وزیراعظم شہباز شریف نے مزید بتایا کہ معاہدے کے بعد آئندہ ہفتے تکنیکی سطح پر مزید مذاکرات منعقد ہوں گے تاکہ طے شدہ نکات پر عملدرآمد اور آئندہ کے لائحہ عمل کو حتمی شکل دی جا سکے۔

انہوں نے امریکا اور ایران کی قیادت کا شکریہ ادا کرتے ہوئے کہا کہ دونوں ممالک نے مسلسل عزم اور مذاکرات کے دوران تعمیری طرزِ عمل کا مظاہرہ کیا، جس کے باعث ایک اہم سفارتی پیش رفت ممکن ہو سکی ہے۔

وزیراعظم کا کہنا تھا کہ انہیں یقین ہے کہ یہ تاریخی امن معاہدہ نہ صرف ایران اور امریکا کے تعلقات میں بہتری لائے گا بلکہ پورے خطے میں دیرپا امن، استحکام اور باہمی تعاون کے لیے ایک مضبوط بنیاد بھی فراہم کرے گا۔

اپنی سوشل میڈیا پوسٹ میں وزیراعظم شہباز شریف نے امریکی صدر ڈونلڈ ٹرمپ، امریکی نائب صدر جے ڈی وینس، امریکی وزیر خارجہ مارکو روبیو، خصوصی ایلچی اسٹیو وٹکوف، ایرانی صدر مسعود پزشکیان اور ایرانی وزیر خارجہ عباس عراقچی کو بھی ٹیگ کیا۔

وزیراعظم شہباز شریف نے کہا ہے کہ امریکا اور ایران کے درمیان امن معاہدہ حتمی مراحل میں ہے اور اگلے 24 گھنٹوں میں اس پر اتفاق متوقع ہے۔ ان کے مطابق پاکستان معاہدے پر الیکٹرانک دستخط کی تیاری کر رہا ہے، جبکہ آئندہ ہفتے تکنیکی مذاکرات بھی ہوں گے۔