امریکا ایران امن معاہدہ: ٹرمپ نے شہباز شریف کا بیان ٹروتھ سوشل پر شیئر کر دیا

(اسلام آباد - واشنگٹن ) : امریکی صدر ڈونلڈ ٹرمپ نے امریکا اور ایران کے درمیان ممکنہ امن معاہدے سے متعلق وزیراعظم محمد شہباز شریف کا بیان اپنے سوشل میڈیا پلیٹ فارم "ٹروتھ سوشل" پر شیئر کر دیا، جس کے بعد اس سفارتی پیش رفت کو عالمی سطح پر غیر معمولی توجہ حاصل ہو گئی ہے۔

وزیراعظم شہباز شریف نے اپنے بیان میں کہا تھا کہ امریکا اور ایران پہلے سے کہیں زیادہ امن معاہدے کے قریب پہنچ چکے ہیں اور توقع ہے کہ آئندہ 24 گھنٹوں میں اس معاہدے کو حتمی شکل دے دی جائے گی۔

انہوں نے کہا کہ پاکستان معاہدے کی تکمیل کے فوراً بعد الیکٹرانک دستخط کے عمل کے لیے تیاریاں کر رہا ہے، جبکہ اگلے ہفتے تکنیکی سطح کے مذاکرات کا بھی امکان ہے۔ وزیراعظم نے مذاکراتی عمل میں تعاون پر امریکا اور ایران کا شکریہ ادا کرتے ہوئے امید ظاہر کی کہ یہ پیش رفت خطے میں امن اور استحکام کے فروغ کا باعث بنے گی۔

شہباز شریف نے اپنے بیان میں خطے کے برادر ممالک کی حمایت کو بھی سراہا اور کہا کہ یہ تاریخی سفارتی پیش رفت دیرپا امن کے قیام کے لیے ایک مضبوط بنیاد ثابت ہو سکتی ہے۔

ذرائع کے مطابق امریکی صدر ڈونلڈ ٹرمپ کی جانب سے وزیراعظم پاکستان کے بیان کو ٹروتھ سوشل پر شیئر کیے جانے کو ایک اہم سفارتی اشارہ قرار دیا جا رہا ہے، جس سے اس ممکنہ معاہدے کی بین الاقوامی اہمیت مزید بڑھ گئی ہے۔

دوسری جانب امریکا اور ایران کے درمیان ممکنہ امن معاہدے سے متعلق پیش رفت جاری ہے جبکہ ایرانی وزیر خارجہ کے حالیہ بیانات بھی عالمی میڈیا اور سفارتی حلقوں میں توجہ کا مرکز بنے ہوئے ہیں۔

پاکستانی سفارتی ذرائع کا کہنا ہے کہ دونوں ممالک کے درمیان کشیدگی میں کمی اور مذاکرات کو آگے بڑھانے کے لیے پاکستان نے بھی فعال اور مثبت کردار ادا کیا ہے، جسے مختلف بین الاقوامی فریقین کی جانب سے سراہا جا رہا ہے۔