بانی چیئرمین سے ملاقات میں استعفیٰ پیش کر دوں گا، سلمان اکرم راجا

اسلام آباد: پاکستان تحریک انصاف کے مرکزی رہنما سلمان اکرم راجا نے کہا ہے کہ وہ بانی چیئرمین سے ملاقات کے دوران اپنا استعفیٰ پیش کر دیں گے اور یہ ان کی ذاتی خواہش ہوگی کہ بانی پی ٹی آئی ان کے فیصلے کو قبول کریں۔

اسلام آباد میں میڈیا سے گفتگو کرتے ہوئے سلمان اکرم راجا نے کہا کہ بانی چیئرمین کی بہنیں ان سے ملنے آئیں اور پارٹی معاملات میں ساتھ کام کرنے کی درخواست کی، تاہم انہوں نے واضح کیا کہ سیاسی امور کو سمجھنے کیلئے تجربہ ضروری ہوتا ہے اور علیمہ خان سمیت دیگر بہنیں سیاسی معاملات کی پیچیدگیوں سے مکمل طور پر آگاہ نہیں ہیں۔

انہوں نے کہا کہ بانی چیئرمین نے خود ان پر اس عہدے کی ذمہ داری ڈالی ہے، اسی لیے وہ اپنی ذمہ داریاں نبھا رہے ہیں، تاہم اگر بانی چیئرمین سے ملاقات ہوئی تو وہ اپنا استعفیٰ پیش کرنے کیلئے تیار ہیں۔

سلمان اکرم راجا نے مزید کہا کہ سیاست میں تجربہ کار قیادت کی ضرورت ہوتی ہے اور علامہ ناصر عباس اور محمود اچکزئی جیسے رہنماؤں کو جان بوجھ کر خائف کیا گیا، جبکہ پارٹی کو انہیں ساتھ لے کر چلنا چاہیے۔

انہوں نے علیمہ خان سے اختلافات کو وقتی ردعمل قرار دیتے ہوئے کہا کہ ان کے درمیان کوئی مستقل دوریاں نہیں ہیں۔ ان کا کہنا تھا کہ ایک بڑے اجتماع کی کال دی گئی تھی تاہم توقع کے مطابق لوگ شریک نہ ہوئے، جس کے باعث یہ صورتحال پیدا ہوئی۔