رینجرز کیمپ حملہ: پاکستان کا افغان ناظم الامور کو طلب، کراچی حملے میں افغان شہریوں کے ملوث ہونے پر شدید احتجاج

اسلام آباد: پاکستان نے کراچی میں رینجرز کیمپ پر ہونے والے دہشت گرد حملے کے بعد افغان ناظم الامور کو دفتر خارجہ طلب کرکے شدید احتجاج ریکارڈ کرایا ہے۔ وزارت خارجہ کے مطابق حملے کی تحقیقات میں افغان شہریوں کے ملوث ہونے کے شواہد سامنے آئے ہیں، جس کے بعد افغان عبوری حکومت کو باضابطہ احتجاجی مراسلہ (ڈیمارش) بھی جاری کیا گیا۔

دفتر خارجہ کے ترجمان کے مطابق افغان ناظم الامور کو طلب کرکے اس بات پر سخت تشویش کا اظہار کیا گیا کہ افغان سرزمین اور افغان شہریوں کو پاکستان کے اندر دہشت گرد کارروائیوں کی منصوبہ بندی اور ان پر عمل درآمد کے لیے استعمال کیا جا رہا ہے۔

ترجمان نے بتایا کہ اسی نوعیت کا احتجاجی مراسلہ افغانستان میں پاکستان کے سفیر عبید الرحمٰن نظامانی نے بھی افغان وزارت خارجہ کے حکام کے حوالے کیا، جس میں مطالبہ کیا گیا کہ افغان حکومت اپنی سرزمین کو پاکستان کے خلاف دہشت گردی کے لیے استعمال ہونے سے روکنے کے لیے مؤثر اقدامات کرے۔

وزارت خارجہ کے مطابق کراچی میں ہونے والے دہشت گرد حملے میں افغان شہریوں کے ملوث ہونے کے واضح شواہد موجود ہیں، جبکہ حملے میں شامل ایک افغان حملہ آور کو زندہ گرفتار بھی کیا گیا ہے، جس سے تحقیقات کو مزید تقویت ملی ہے۔

ترجمان دفتر خارجہ کا کہنا تھا کہ یہ واقعہ اس بات کا ایک اور ثبوت ہے کہ سرحد پار سے دہشت گرد عناصر پاکستان میں حملوں کی منصوبہ بندی اور کارروائیاں انجام دینے کی کوشش کر رہے ہیں۔ انہوں نے زور دیا کہ افغانستان اپنی بین الاقوامی ذمہ داریوں کو پورا کرتے ہوئے دہشت گرد تنظیموں کے خلاف مؤثر کارروائی کرے تاکہ دونوں ممالک کے درمیان امن و استحکام کو یقینی بنایا جا سکے۔

پاکستان نے افغان عبوری حکومت پر زور دیا ہے کہ وہ اپنی سرزمین کو کسی بھی دہشت گرد تنظیم یا گروہ کے استعمال سے روکنے کے لیے فوری اور فیصلہ کن اقدامات کرے، تاکہ خطے میں امن و سلامتی کو لاحق خطرات کا خاتمہ ممکن بنایا جا سکے۔