ناکہ بندی کے دوران مزاحمت ایران کیلئے دانشمندانہ اقدام نہیں ہوگا: امریکی وزیر جنگ

(واشنگٹن)اپنے بیان میں امریکی وزیر جنگ نے کہا کہ ناکہ بندی کے دوران ایرانیوں کی جانب سے فائرنگ متوقع ہے، تاہم ایسا کوئی اقدام ایران کے لیے فائدہ مند ثابت نہیں ہوگا۔ انہوں نے دعویٰ کیا کہ ایران اپنی جنگی صلاحیتوں کو دوبارہ تیار کرنے کی پوزیشن میں نہیں ہے۔

پیٹ ہیگستھ نے مزید کہا کہ ایران کی فضائی حدود امریکی نگرانی میں ہے اور امریکی صدر ڈونلڈ ٹرمپ ایران کو مکمل طور پر مفلوج کرنے کی صلاحیت رکھتے ہیں، تاہم انہوں نے رحم دلی کا مظاہرہ کیا ہے۔

واضح رہے کہ امریکی فوج نے ایران کے سمندری راستوں کی ناکہ بندی شروع کر دی ہے۔ امریکا نے اعلان کیا ہے کہ ایرانی بندرگاہوں میں داخل اور باہر جانے والے جہازوں کی نقل و حرکت کو محدود کیا جائے گا۔

امریکی سینٹ کام کے مطابق ناکہ بندی کا اطلاق خلیج عرب اور خلیج عمان میں ایرانی بندرگاہوں سے آنے جانے والے جہازوں پر بھی ہوگا۔

امریکی فوج کے مطابق ناکہ بندی کے علاقے میں بغیر اجازت داخل ہونے یا نکلنے والے کسی بھی جہاز کو روکا، موڑا یا قبضے میں لیا جا سکتا ہے، جبکہ صورتحال کے پیش نظر خطے میں کشیدگی مزید بڑھنے کا خدشہ ظاہر کیا جا رہا ہے۔