شہباز شریف اور بلاول بھٹو کی ملاقات، آزاد کشمیر کی صورتحال پر تفصیلی تبادلہ خیال

اسلام آباد: وزیراعظم محمد شہباز شریف اور چیئرمین پاکستان پیپلز پارٹی بلاول بھٹو زرداری کے درمیان اہم ملاقات ہوئی جس میں آزاد کشمیر کی موجودہ سیاسی صورتحال اور دیگر اہم امور پر تبادلہ خیال کیا گیا۔

ذرائع کے مطابق ملاقات کے دوران آزاد کشمیر میں جاری صورتحال کا تفصیلی جائزہ لیا گیا۔ چیئرمین پیپلز پارٹی نے مسائل کے حل اور کشیدگی میں کمی کے لیے مذاکرات اور سیاسی مشاورت کی اہمیت پر زور دیا۔

ملاقات میں بلاول بھٹو زرداری نے وزیراعظم شہباز شریف کو آزاد کشمیر کی صورتحال کے حوالے سے اپنی جماعت کے مؤقف سے آگاہ کیا اور کہا کہ تمام فریقین کے درمیان بات چیت کے ذریعے مسائل کا پائیدار حل تلاش کیا جانا چاہیے۔

ذرائع کے مطابق چیئرمین پیپلز پارٹی نے وزیراعظم کو آزاد کشمیر میں پارٹی کی پارلیمانی قیادت کی جانب سے تیار کردہ مختلف تجاویز سے بھی آگاہ کیا۔ ان تجاویز کا مقصد خطے میں سیاسی استحکام، عوامی اعتماد کی بحالی اور موجودہ صورتحال کے پرامن حل کی راہ ہموار کرنا ہے۔

ملاقات میں مجموعی سیاسی صورتحال اور باہمی تعاون کے مختلف پہلوؤں پر بھی تبادلہ خیال کیا گیا۔ ذرائع کا کہنا ہے کہ حکومت اور پیپلز پارٹی آئندہ بھی اہم قومی معاملات پر مشاورت کا سلسلہ جاری رکھیں گے۔