ایران امریکا سیز فائر تجویز کو ’اسلام آباد اکارڈ‘ کا نام، پاکستان کی سفارتی کوششیں تیز

(اسلام آباد) برطانوی خبر ایجنسی رائٹرز کے مطابق جنگ بندی تجویز سے واقف ذرائع کا کہنا ہے کہ پاکستان کی جانب سے پیش کیا گیا فریم ورک دو مراحل پر مشتمل ہے۔ پہلے مرحلے میں فوری جنگ بندی جبکہ دوسرے مرحلے میں جامع اور حتمی جنگ بندی معاہدہ شامل ہوگا۔

رپورٹ کے مطابق پاکستان کے آرمی چیف فیلڈ مارشل عاصم منیر جنگ بندی کی کوششوں کے سلسلے میں امریکا کے نائب صدر جے ڈی وینس، صدر ٹرمپ کے مشیر اسٹیو وٹکوف اور ایران کے وزیر خارجہ عباس عراقچی کے ساتھ مسلسل رابطے میں رہے۔

رائٹرز کے مطابق مجوزہ ’اسلام آباد اکارڈ‘ کے تحت ابتدائی طور پر آبنائے ہرمز کو فوری طور پر کھولا جائے گا، جبکہ 15 سے 20 روز کے اندر جامع جنگ بندی فریم ورک تیار کیا جائے گا۔ ذرائع کا کہنا ہے کہ اس معاہدے پر آج اتفاق رائے ہونے کا امکان ہے۔

دوسری جانب سینئر ایرانی حکام نے بھی تصدیق کی ہے کہ پاکستان کی جانب سے فوری جنگ بندی کی تجویز موصول ہو گئی ہے اور ایران اس کا جائزہ لے رہا ہے۔ ایرانی حکام کا کہنا ہے کہ کسی بھی فیصلے کے لیے ڈیڈ لائن یا دباؤ قبول نہیں کیا جائے گا۔

سفارتی ذرائع کے مطابق پاکستان کی جانب سے پیش کی گئی یہ تجویز خطے میں کشیدگی کم کرنے اور ممکنہ جنگ کو روکنے کی اہم کوشش قرار دی جا رہی ہے۔