ایران کا میزائل پروگرام مذاکرات کا حصہ نہیں رہا، پاکستان امن کے لیے کردار ادا کرتا رہے گا: وزیراعظم شہباز شریف

وزیراعظم شہباز شریف نے کہا ہے کہ ایران کا میزائل پروگرام کسی بھی مرحلے پر مذاکرات کا حصہ نہیں رہا اور پاکستان خطے میں امن، استحکام اور خوشحالی کے لیے اپنا مثبت کردار جاری رکھے گا۔

اسلام آباد میں مفاہمتی یادداشت پر دستخط کی تقریب سے خطاب کرتے ہوئے وزیراعظم نے ایرانی صدر مسعود پزشکیان کا خیرمقدم کیا اور کہا کہ دونوں برادر ممالک خطے کے روشن اور پرامن مستقبل کے لیے مشترکہ کوششوں پر یقین رکھتے ہیں۔

وزیراعظم نے کہا کہ یہ تاریخی پیش رفت خطے میں امن و استحکام کی جانب ایک اہم سنگِ میل ہے۔ انہوں نے جنگ بندی کے حصول کے لیے فیلڈ مارشل سید عاصم منیر کی کاوشوں کو سراہتے ہوئے کہا کہ امن کے قیام کے لیے انتھک سفارتی اور عسکری کوششیں کی گئیں۔

شہباز شریف نے ایرانی قیادت اور عوام کے عزم و حوصلے کو خراج تحسین پیش کرتے ہوئے کہا کہ اللہ تعالیٰ کے فضل و کرم سے مذاکراتی عمل کامیاب ہوا۔ انہوں نے کہا کہ ایران نے پاکستان کی ثالثی پر اعتماد کیا جس پر پاکستان شکر گزار ہے، جبکہ پائیدار امن کے قیام تک سفارتی کوششیں جاری رکھی جائیں گی۔

وزیراعظم نے امید ظاہر کی کہ ایران مستقبل میں ایک بڑی معاشی طاقت بن کر ابھرے گا اور پاکستان و ایران کے برادرانہ تعلقات مزید مضبوط ہوں گے۔

انہوں نے واضح کیا کہ ایران کے میزائل پروگرام پر مذاکرات کے دوران کوئی بات چیت نہیں ہوئی۔ ان کا کہنا تھا کہ دنیا کے دیگر ممالک کے پاس میزائل صلاحیت موجود ہے تو ایران کے دفاعی معاملات کو بھی اسی تناظر میں دیکھا جانا چاہیے۔

شہباز شریف نے کہا کہ عالمی سطح پر امن معاہدوں کو نقصان پہنچانے والے عناصر ہمیشہ موجود رہتے ہیں، تاہم پاکستان خطے میں دیرپا امن اور استحکام کے لیے اپنی کوششیں جاری رکھے گا۔