کوہاٹ پولیس لائنز دھماکا، بم ڈسپوزل یونٹ کی تفصیلی رپورٹ سامنے آگئی

کوہاٹ: کوہاٹ پولیس لائنز دھماکے سے متعلق بم ڈسپوزل یونٹ کی تفصیلی رپورٹ سینٹرل پولیس آفس کو ارسال کردی گئی ہے، جس میں دھماکے کی شدت، استعمال ہونے والے دھماکا خیز مواد اور حملہ آوروں کی کارروائی سے متعلق اہم تفصیلات سامنے آئی ہیں۔

رپورٹ کے مطابق بم ڈسپوزل یونٹ نے دھماکے کے مرکز کا تعین کرنے کے بعد دھماکا خیز مواد کی نوعیت اور مقدار کا جائزہ لیا۔ دھماکے کے نتیجے میں بننے والے گڑھے کا ظاہری قطر 6.6 فٹ بائی 11 فٹ جبکہ گہرائی 4.6 فٹ ریکارڈ کی گئی۔

رپورٹ میں بتایا گیا ہے کہ دھماکے میں مجموعی طور پر 869 کلوگرام دھماکا خیز مواد استعمال کیا گیا، جبکہ دھماکے میں استعمال ہونے والی گاڑی کی ابتدائی شناخت بھی کرلی گئی ہے۔

بم ڈسپوزل یونٹ کے مطابق اسپیشل برانچ کی عمارت کے اندر سے غیر پھٹا ہوا دھماکا خیز مواد بھی برآمد ہوا۔ گراؤنڈ فلور سے 2 آئی ای ڈیز جبکہ پہلی منزل سے ایک خودکش جیکٹ ملی، جس میں 4 آئی ای ڈیز نصب تھیں۔

رپورٹ کے مطابق دھماکے کے بعد حملہ آور پرانی پولیس لائنز کوہاٹ میں داخل ہوئے اور مسلح حملہ کیا۔ حملہ آور بعد ازاں اسپیشل برانچ بلاک میں مضبوط مورچے بنا کر موجود رہے۔

یاد رہے کہ 18 ستمبر کو کوہاٹ پولیس لائنز کی مسجد میں نماز جمعہ کے دوران خودکش حملہ ہوا تھا، جس میں پولیس اہلکاروں سمیت 22 افراد شہید اور 100 سے زائد زخمی ہوئے تھے۔