آبنائے ہرمز کی صورتحال کبھی پہلے جیسی نہیں ہوگی، ایران کا دوٹوک مؤقف

(تہران)میڈیا سے گفتگو کرتے ہوئے علی نیکزاد نے کہا کہ ایک بات یقینی ہے کہ ایران آبنائے ہرمز سے پیچھے نہیں ہٹے گا۔ انہوں نے بتایا کہ ہرمز صوبے کے حکام اور وہاں تعینات فورسز کو ضروری ٹاسک دے دیا گیا ہے تاکہ کسی بھی صورتحال کا مؤثر جواب دیا جا سکے۔

انہوں نے دعویٰ کیا کہ امریکا آبنائے ہرمز کو مکمل طور پر کھلوانے میں ناکام رہا ہے اور اس کی جانب سے ممکنہ ناکہ بندی بھی کامیاب نہیں ہوگی۔

ایرانی ڈپٹی اسپیکر نے مزید کہا کہ اسرائیل کے بحری جہاز کبھی بھی آبنائے ہرمز سے نہیں گزر سکیں گے، جبکہ امریکا اور اس کے اتحادی جارح ممالک کو بھی سخت پابندیوں کا سامنا کرنا پڑے گا۔

علی نیکزاد کے مطابق دیگر ممالک کے جہاز ایران کی اجازت سے آبنائے ہرمز سے گزر سکیں گے، تاہم ایران اپنی قومی سلامتی اور خطے کے مفادات پر کوئی سمجھوتہ نہیں کرے گا۔

ان کے اس بیان کے بعد خطے میں کشیدگی مزید بڑھنے کے امکانات ظاہر کیے جا رہے ہیں، جبکہ عالمی سطح پر بھی اس صورتحال پر گہری نظر رکھی جا رہی ہے۔