ٹرمپ کا سعودی عرب کو مشورہ، حوثیوں کے خلاف اسرائیلی مدد قبول کرنے پر زور

واشنگٹن: امریکی صدر ڈونلڈ ٹرمپ نے سعودی عرب کو مشورہ دیا ہے کہ وہ یمن کے حوثیوں کے خلاف لڑائی میں مدد دینے سے متعلق اسرائیل کی پیشکش قبول کر لے۔ ٹرمپ کا کہنا ہے کہ اسرائیل سعودی عرب کے لیے بہت مددگار ثابت ہوا ہے۔

وائٹ ہاؤس میں صحافیوں سے گفتگو کرتے ہوئے ڈونلڈ ٹرمپ سے سوال کیا گیا کہ کیا سعودی عرب کو اسرائیل کی جانب سے تعاون کی پیشکش قبول کرنی چاہیے؟ اس پر امریکی صدر نے جواب دیا کہ ہاں، بالکل، میرے خیال میں سعودی عرب کو ایسا کرنا چاہیے۔

ایران سے متعلق گفتگو کرتے ہوئے ٹرمپ نے جنگ کو فوجی مشق قرار دیا اور کہا کہ وہ تہران کی سرگرمیوں اور بیانات سے مکمل طور پر آگاہ ہیں۔ ان کے مطابق امریکا جانتا ہے کہ ایرانی قیادت کیا کر رہی ہے اور کیا کہہ رہی ہے۔ ٹرمپ نے یہ بھی کہا کہ ممکن ہے وہ ایرانی قیادت کے معاملے میں کچھ زیادہ آگے نکل گئے ہوں۔

امریکی صدر کا مزید کہنا تھا کہ ایران میں اب کوئی ایسا شخص باقی نہیں بچا جس سے وہ بات کر سکیں۔ انہوں نے دعویٰ کیا کہ سعودی عرب امریکا کی حمایت حاصل کرکے بہت خوش ہے۔

روس اور یوکرین جنگ کے حوالے سے ٹرمپ نے کہا کہ روسی صدر جنگ ختم کرنا چاہتے ہیں۔ انہوں نے یوکرین کی اسٹارلنک تک رسائی محدود کرنے میں اپنے اور ایلون مسک کے کردار کی تردید کی اور کہا کہ امریکا کا اس معاملے سے کوئی تعلق نہیں۔

ڈونلڈ ٹرمپ نے مزید کہا کہ امریکا روس اور چین کے ساتھ جوہری ہتھیاروں سے متعلق معاہدہ کرے گا۔