بلدیاتی انتخابات میں شکست کے بعد برطانوی وزیراعظم کیئر اسٹارمر پر استعفے کا دباؤ بڑھ گیا

برطانوی میڈیا رپورٹس کے مطابق نائب وزیراعظم ڈیوڈ لیمی اوروزیر داخلہ شبانہ محمود سمیت کابینہ کے اہم اراکین نے وزیراعظم سے مطالبہ کیا ہے کہ وہ عہدہ چھوڑنے کے لیے واضح لائحہ عمل پیش کریں۔

رپورٹس کے مطابق بلدیاتی انتخابات میں شکست کے بعد اب تک چار جونیئر حکومتی ارکان اپنے عہدوں سے مستعفی ہو چکے ہیں، جبکہ وزیراعظم کے خلاف آواز اٹھانے والے لیبر اراکین پارلیمنٹ کی تعداد بڑھ کر 70 تک پہنچ گئی ہے۔

پارٹی قواعد کے مطابق نئے لیڈر کے انتخاب کے لیے باضابطہ تحریک لانے کی خاطر 81 اراکین پارلیمنٹ کی حمایت درکار ہوگی۔ اس وقت لیبر پارٹی کے اراکین کی مجموعی تعداد 403 ہے۔

برطانوی میڈیا کے مطابق وزیر خارجہ ڈیوڈ لیمی نے وزیراعظم کیئر اسٹارمر کو مشورہ دیا کہ اقتدار کی منظم منتقلی کے لیے مناسب طریقہ کار طے کیا جانا چاہیے تاکہ پارٹی کے اندر مزید بحران پیدا نہ ہو۔

یاد رہے کہ حالیہ بلدیاتی انتخابات میں حکمران لیبر پارٹی کو شدید دھچکا پہنچا تھا، جہاں پارٹی کو 1300 سے زائد نشستوں پر شکست کا سامنا کرنا پڑا۔ نتائج کے بعد پارٹی قیادت پر سوالات مزید شدت اختیار کر گئے ہیں۔

دوسری جانب وزیراعظم کیئر اسٹارمر نے استعفے کی خبروں کو مسترد کرتے ہوئے واضح کیا ہے کہ وہ عہدہ چھوڑنے کا کوئی ارادہ نہیں رکھتے اور آئندہ عام انتخابات میں بھی پارٹی کی قیادت خود کریں گے۔