امریکی نمائندے ایران سے متعلق مزاکرات پر پاکستان جارہے ہیں، وائٹ ہائوس

( خصوصی رپورٹ / محمد نعیم اختر )

امریکی نمائندے ایران کے ساتھ مزاکرات کیلئے کل واشنگٹن ڈی سی سے پاکستان کیلئے روانہ ہورہے ہیں۔

یہ پیش رفت ایسے وقت میں سامنے آئی ہے جب ایران کے وزیر خارجہ عباس عراقچی پاکستان پہنچے ہیں۔

ادھر امریکی وزیر دفاع پیٹ ہیگستھ نے کہا ہے کہ ایران کے پاس ایک “دانشمندانہ اور بہتر معاہدہ” کرنے کا موقع موجود ہے۔ انہوں نے مزید کہا کہ ایران کی بندرگاہوں پر امریکی بحری ناکہ بندی مزید مضبوط ہو رہی ہے اور عالمی سطح تک پھیل رہی ہے۔

ہیگستھ نے صدر ڈونلڈ ٹرمپ کے مؤقف کو دہراتے ہوئے کہا کہ امریکہ کسی معاہدے کے لیے بے چین نہیں، اور اب فیصلہ ایران کے ہاتھ میں ہے۔

دوسری جانب مشرق وسطیٰ میں کشیدگی برقرار ہے جہاں اسرائیلی دفاعی افواج اور حزب اللہ نے ایک دوسرے پر جنگ بندی کی خلاف ورزی کے الزامات عائد کیے ہیں۔ یہ صورتحال اس اعلان کے بعد سامنے آئی ہے جس میں اسرائیل اور لبنان کے درمیان جنگ بندی میں تین ہفتوں کی توسیع کی گئی تھی۔

تجزیہ کاروں کے مطابق لبنان اور اسرائیل کے درمیان مستقل امن معاہدے کی راہ میں حزب اللہ کا اسلحہ ایک بڑا مسئلہ بنا ہوا ہے۔

ایران سے موصولہ رپورٹس کے مطابق، امریکی بیانات کے جواب میں ایرانی قیادت نے عوام کو اتحاد کا پیغام دینے کے لیے مشترکہ پیغامات جاری کیے ہیں۔