ایران کا بڑا اعلان: اسرائیلی جہازوں کیلئے آبنائے ہرمز بند کرنے کی تیاری

(تہران) ایران نے اہم سمندری گزرگاہ آبنائے ہرمز میں اسرائیلی جہازوں کے داخلے پر پابندی لگانے کیلئے نئی قانون سازی تیار کرنے کا اعلان کر دیا ہے۔

ایرانی پارلیمنٹ کے نائب اسپیکر حمید رضا حاجی بابائی کے مطابق ایک مجوزہ بل پر کام جاری ہے جس کے تحت اسرائیلی جہازوں کو کسی بھی وقت آبنائے ہرمز سے گزرنے کی اجازت نہیں دی جائے گی۔

انہوں نے کہا کہ اس قانون کے تحت “دشمن ممالک” کے جہازوں کو اس وقت تک گزرنے کی اجازت نہیں ہوگی جب تک وہ جنگی ہرجانہ ادا نہ کریں۔

مزید برآں، دیگر ممالک کے جہاز ایران سے پیشگی اجازت اور منظوری حاصل کرنے کے بعد ہی اس اہم گزرگاہ سے گزر سکیں گے۔

واضح رہے کہ آبنائے ہرمز دنیا کی اہم ترین تجارتی اور تیل بردار گزرگاہوں میں شمار ہوتی ہے، جہاں کسی بھی قسم کی پابندی عالمی معیشت اور توانائی کی سپلائی پر اثر انداز ہو سکتی ہے۔

تجزیہ کاروں کے مطابق اگر یہ قانون نافذ ہو جاتا ہے تو اس سے خطے میں کشیدگی میں اضافہ اور اسرائیل اور ایران کے درمیان تعلقات مزید پیچیدہ ہو سکتے ہیں۔