سعودی عرب کا خطے میں کشیدگی پر اظہار تشویش، پاکستان کی سفارتی کوششوں کی حمایت

(جدہ )سعودی کابینہ کا اہم اجلاس ولی عہد و وزیراعظم شہزادہ محمد بن سلمان کی زیر صدارت منعقد ہوا جس میں علاقائی صورتحال کا تفصیلی جائزہ لیا گیا۔ اجلاس میں زور دیا گیا کہ تنازعات کا حل طاقت کے بجائے سیاسی و سفارتی ذرائع سے نکالا جائے۔

میڈیا رپورٹس کے مطابق کابینہ نے پاکستان کی جانب سے جاری ثالثی کوششوں کو سراہتے ہوئے کہا کہ ان اقدامات سے خطے میں امن و استحکام کے امکانات بڑھ سکتے ہیں۔ سعودی حکام نے اس بات پر بھی زور دیا کہ کشیدگی میں اضافہ پورے خطے کیلئے نقصان دہ ہو سکتا ہے۔

اجلاس میں آبنائےہرمز میں جہازوں کی محفوظ اور بلا رکاوٹ آمدورفت کو یقینی بنانے کی اہمیت پر بھی زور دیا گیا، کیونکہ یہ عالمی تجارت خصوصاً تیل کی ترسیل کیلئے نہایت اہم گزرگاہ ہے۔

سعودی وزارت خارجہ نے بھی پاکستان کی سفارتی کوششوں کی حمایت کرتے ہوئے کہا کہ مسئلے کا ایسا سیاسی حل تلاش کیا جانا چاہیے جو خطے کو مزید عدم استحکام سے بچا سکے۔

سعودی میڈیا کے مطابق اجلاس میں سعودی وزارت انصاف اور پاکستان کی وزارت قانون کے درمیان تعاون کی مفاہمتی یادداشت کی منظوری بھی دی گئی، جس سے دونوں ممالک کے تعلقات مزید مضبوط ہونے کی توقع ہے۔