منی لانڈرنگ کرنے والوں کو کوئی معافی نہیں دی جائے گی، وزیر داخلہ

(اسلام آباد)ایک تقریب سے خطاب کرتے ہوئے وزیر داخلہ نے کہا کہ حکومت تاجروں کو سہولیات فراہم کرنے کیلئے پرعزم ہے اور بزنس کمیونٹی کے ساتھ مکمل تعاون کیا جائے گا۔ انہوں نے کہا کہ ملک کو سنوارنے اور دستیاب معاشی مواقع سے فائدہ اٹھانے کی ضرورت ہے۔

محسن نقوی کا کہنا تھا کہ جو لوگ ملک سے سرمایہ بیرون ملک منتقل کر چکے ہیں ان کا سراغ لگانا مشکل نہیں، حکومت اس حوالے سے مؤثر اقدامات کر رہی ہے۔ انہوں نے شہریوں کو ہدایت کی کہ وہ کرنسی کی تبدیلی کیلئے غیر قانونی ذرائع کے بجائے بینکنگ نظام کا استعمال کریں۔

وزیر داخلہ نے کہا کہ اگر تاجر سنجیدگی سے کردار ادا کریں تو بجٹ سے قبل اربوں ڈالر ملک میں واپس لائے جا سکتے ہیں۔ ان کے مطابق بڑی رقم بیرون ملک موجود ہے جسے واپس لانے کی گنجائش موجود ہے۔

انہوں نے مزید کہا کہ چند افراد کی غلطیوں کی وجہ سے پوری بزنس کمیونٹی کو نشانہ نہیں بنایا جا سکتا، تاہم غیر قانونی سرگرمیوں میں ملوث افراد کے خلاف بلا امتیاز کارروائی ہوگی۔

محسن نقوی نے کہا کہ وزیراعظم اور عسکری قیادت ملکی معیشت کو مستحکم بنانے کیلئے پُرعزم ہیں اور معاشی استحکام کیلئے تمام ممکنہ اقدامات جاری ہیں۔