پنجاب حکومت کا بڑا فیصلہ: بائیکرز کو فی لیٹر 100 روپے پٹرول سبسڈی، 24 ارب روپے کی سمری ارسال

(لاہور)ذرائع کے مطابق محکمہ خزانہ پنجاب نے فنڈز کی منظوری کے لیے سمری وزیراعلیٰ پنجاب مریم نواز کو ارسال کر دی ہے، منظوری کے بعد بائیکرز سبسڈی کے لیے فنڈز جاری کیے جائیں گے۔

حکام کا کہنا ہے کہ پنجاب میں سوا کروڑ بائیکرز کو ماہانہ 2 ہزار روپے سبسڈی دینے کا تخمینہ لگایا گیا ہے۔ اس منصوبے کے تحت عوام کو مہنگائی کے اثرات سے بچانے اور سفری اخراجات کم کرنے کا ہدف رکھا گیا ہے۔

ذرائع کے مطابق بائیکرز سبسڈی اسکیم کے لیے 80 لاکھ سے زائد بائیکرز نے رجسٹریشن مکمل کر لی ہے جبکہ رجسٹریشن کے عمل کی تکمیل کے بعد سبسڈی کا باقاعدہ آغاز کیا جائے گا۔

محکمہ ٹرانسپورٹ کے اعداد و شمار کے مطابق 1980 سے اب تک پنجاب میں موٹرسائیکلوں کی تعداد 5 کروڑ تک رجسٹرڈ ہو چکی ہے، جس کے باعث حکومت نے بائیکرز کو براہ راست ریلیف دینے کا فیصلہ کیا ہے۔

حکام کے مطابق وزیراعلیٰ پنجاب کی منظوری کے بعد بائیکرز سبسڈی پروگرام کا باقاعدہ اعلان متوقع ہے۔