پاکستان متحدہ عرب امارات کے عوام کے ساتھ کھڑا ہے، خورفکان بندرگاہ واقعے پر وزیراعظم کا اظہارِ تشویش

(اسلام آباد) سوشل میڈیا پلیٹ فارم ایکس پر جاری اپنے بیان میں وزیراعظم شہباز شریف نے کہا کہ خورفکان بندرگاہ پر میزائل ملبہ گرنے کے واقعے میں پاکستانی شہریوں سمیت کئی عام افراد کے زخمی ہونے کی اطلاعات تشویشناک ہیں۔ انہوں نے کہا کہ حکومت پاکستان زخمی پاکستانی شہریوں کو ہر ممکن مدد فراہم کرنے کے لیے یو اے ای حکام سے مسلسل رابطے میں ہے۔

وزیراعظم نے زخمیوں کی جلد صحت یابی کے لیے نیک خواہشات کا اظہار کرتے ہوئے کہا کہ پاکستان خطے میں تحمل اور کشیدگی میں فوری کمی کی ضرورت پر زور دیتا ہے۔ انہوں نے کہا کہ موجودہ صورتحال میں سفارتکاری اور مذاکرات ہی مسئلے کا حل ہیں۔

دوسری جانب امریکی اخبار وال اسٹریٹ جرنل کی رپورٹ کے مطابق خطے کے متعدد ممالک ایران کو مذاکرات کی میز پر لانے کے لیے سرگرم ہیں۔ رپورٹ میں کہا گیا ہے کہ پاکستان، مصر اور ترکیہ ایران کو بات چیت پر آمادہ کرنے کی کوششوں میں مصروف ہیں۔

رپورٹ کے مطابق امریکا اور ایران کے درمیان ثالثی کرنے والے ممالک سیز فائر کے لیے سرگرم ہیں، جس کے تحت پہلے مرحلے میں 45 روزہ جنگ بندی اور بعد ازاں جامع معاہدے پر بات چیت کی تجویز زیر غور ہے۔ ذرائع کے مطابق پس پردہ براہِ راست پیغامات کے ذریعے بھی سفارتی رابطے جاری ہیں۔