امریکا میں ایئر شو کے دوران دو فوجی طیارے ٹکرا گئے، 4 پائلٹس محفوظ

امریکی ریاست آئیڈاہو میں ایئر شو کے دوران دو امریکی فوجی طیارے آپس میں ٹکرا گئے، تاہم دونوں طیاروں میں سوار چاروں پائلٹس محفوظ رہے۔

امریکی میڈیا رپورٹس کے مطابق حادثہ ماؤنٹین ہوم ایئر فورس بیس سے تقریباً دو میل دور پیش آیا، جہاں فضائی مظاہرے کے دوران دونوں طیارے فضا میں ایک دوسرے سے ٹکرا گئے۔

رپورٹس کے مطابق دونوں طیاروں کے چاروں پائلٹس نے بروقت ایمرجنسی ایجیکشن کر لیا، جس کے باعث کسی جانی نقصان کی اطلاع نہیں ملی۔

حادثے کے فوراً بعد امدادی اور ریسکیو ٹیمیں جائے وقوعہ پر پہنچ گئیں جبکہ سیکیورٹی خدشات کے پیش نظر ماؤنٹین ہوم ایئر فورس بیس کو عارضی طور پر لاک ڈاؤن کر دیا گیا۔

امریکی حکام کے مطابق واقعے کی تحقیقات شروع کر دی گئی ہیں تاکہ حادثے کی وجوہات کا تعین کیا جا سکے۔