ایرانی صدر مسعود پزشکیان کا ٹرمپ کو دوٹوک جواب، ایران اپنے جوہری حق سے پیچھے نہیں ہٹے گا

(تہران)ایرانی صدر نے اپنے بیان میں کہا کہ ایران کا بنیادی مؤقف خطے میں امن، استحکام اور سلامتی کے تحفظ پر مبنی ہے اور ایران کسی ملک پر حملہ کرنے کا ارادہ نہیں رکھتا۔ انہوں نے کہا کہ ایران صرف اپنے دفاع کا قانونی اور جائز حق استعمال کر رہا ہے اور جنگ کو بڑھانا نہیں چاہتا۔

مسعود پزشکیان نے کہا کہ ایران عزت کے ساتھ تنازع کا خاتمہ چاہتا ہے اور ایران نے کبھی جنگ یا تنازع شروع نہیں کیا۔ ان کے مطابق ایران کسی بھی ملک کے خلاف جارحیت کا ارادہ نہیں رکھتا بلکہ اپنے قومی مفادات کا تحفظ کر رہا ہے۔

ایرانی صدر نے مزید کہا کہ ٹرمپ کو یہ حق حاصل نہیں کہ وہ ایرانی عوام کو ان کے جوہری حقوق سے محروم کریں یا یہ فیصلہ کریں کہ ایران اپنے ایٹمی پروگرام سے فائدہ اٹھا سکتا ہے یا نہیں۔

انہوں نے الزام لگایا کہ دشمن ایران کے خلاف اپنے مقاصد حاصل کرنے میں ناکام رہا اور ایران کے انفراسٹرکچر، سکولوں اور ہسپتالوں کو نشانہ بنایا گیا۔ مسعود پزشکیان نے کہا کہ ایران کو تباہ کرنے اور اسے پتھر کے دور میں واپس بھیجنے جیسے بیانات دشمن کے عزائم کو ظاہر کرتے ہیں۔