بشریٰ انصاری نے طلاق کے باوجود اپنے نام سے ’انصاری‘ کیوں نہیں ہٹایا؟

سینئر اداکارہ بشریٰ انصاری نے اپنے پہلے شوہر سے علیحدگی کے باوجود نام کے ساتھ ’انصاری‘ برقرار رکھنے کی وجہ بتا دی۔

حال ہی میں ایک انٹرویو کے دوران بشریٰ انصاری نے اپنے کیریئر کے ابتدائی دور سمیت مختلف موضوعات پر گفتگو کی۔ انٹرویو کے آغاز میں میزبان نے ان کا تعارف ’بشریٰ بشیر‘ کے نام سے کروایا، جس پر اداکارہ نے وضاحت کی کہ اگرچہ سرکاری کاغذات میں ان کا نام بشریٰ بشیر درج ہے، تاہم وہ عوامی طور پر بشریٰ انصاری کے نام سے ہی جانی جاتی ہیں۔

اداکارہ نے بتایا کہ کئی لوگ انہیں مشورہ دیتے ہیں کہ وہ اپنے نام سے ’انصاری‘ ہٹا دیں، لیکن وہ ایسا کرکے لوگوں کو مزید الجھن میں نہیں ڈالنا چاہتیں۔

بشریٰ انصاری نے مثال دیتے ہوئے کہا کہ اداکارہ صبا حمید کے ساتھ بھی کچھ ایسا ہی ہوا اور ایک طویل عرصے تک لوگ انہیں صبا پرویز کے نام سے جانتے رہے۔

انہوں نے کہا کہ ان کی دونوں بیٹیاں بھی انصاری ہیں اور انصاری صاحب کو بھی ان کے نام کے ساتھ ’انصاری‘ برقرار رکھنے پر کوئی اعتراض نہیں، تو پھر دوسرے لوگوں کو اس معاملے پر پریشان ہونے کی ضرورت نہیں۔

واضح رہے کہ بشریٰ انصاری کی پہلی شادی اقبال انصاری سے ہوئی تھی، جن سے ان کی دو بیٹیاں ہیں۔ دونوں کی شادی 36 سال تک قائم رہنے کے بعد ختم ہو گئی تھی۔