تیل کی قلت نہیں ہونے دی، آبنائے ہرمز سے دو جہاز پاکستان پہنچے: عطا تارڑ

(اسلام آباد ) پریس کانفرنس سے خطاب کرتے ہوئے وزیر اطلاعات عطا تارڑ نے کہا کہ کشیدگی کے آغاز پر وزیراعظم شہباز شریف نے متعلقہ اداروں کو متحرک کر دیا تھا۔ انہوں نے کہا کہ پورے خطے میں تیل کی قلت پیدا ہوئی اور کئی ممالک میں پیٹرول کیلئے لمبی قطاریں لگ گئیں، تاہم حکومت نے بروقت اقدامات کر کے صورتحال کو کنٹرول میں رکھا۔

عطا تارڑ نے بتایا کہ جہاں سے ممکن ہوا تیل کا بندوبست کیا گیا، آبنائے ہرمز کے ذریعے دو جہاز پاکستان پہنچے جبکہ فجیرہ سے بھی تیل کا انتظام کیا گیا۔ انہوں نے کہا کہ عالمی سطح پر تیل کی قیمتیں تاریخی سطح پر پہنچ گئیں، مگر وزیراعظم نے تین ہفتوں تک قیمتوں کا بوجھ عوام پر منتقل نہیں ہونے دیا۔

انہوں نے کہا کہ وزیراعظم شہباز شریف نے عوام کو ریلیف دینے کیلئے خصوصی اقدامات کیے، عید کے موقع پر اسلام آباد میں پبلک ٹرانسپورٹ مفت کی گئی جبکہ سندھ میں بھی کرایوں میں اضافے کو روکا گیا۔ انہوں نے مزید کہا کہ پبلک اور گڈز ٹرانسپورٹ کیلئے ڈیجیٹل والٹ کا نظام بھی متعارف کروایا گیا ہے۔

دوسری جانب وزیر مملکت برائے پٹرولیم مصدق ملک نے کہا کہ گزشتہ تین سے چار ہفتوں کے دوران خطہ جنگی صورتحال سے دوچار رہا اور تیل کی قیمتوں میں شدید اضافہ ہوا، تاہم حکومت عوام کیلئے دیوار بن کر کھڑی رہی۔

مصدق ملک نے بتایا کہ حکومت نے 130 ارب روپے ترقیاتی منصوبوں سے نکال کر عوام کو ریلیف دیا اور ایک ایک پیسہ ذمہ داری کے ساتھ خرچ کیا گیا تاکہ قیمتوں کا بوجھ غریب طبقے پر نہ پڑے۔

انہوں نے کہا کہ موٹرسائیکل استعمال کرنے والوں کو ایک لیٹر پر 100 روپے سبسڈی دی جا رہی ہے، جبکہ چھوٹے ٹرک کو 70 ہزار اور بڑے ٹرک کو 80 ہزار روپے ماہانہ سبسڈی فراہم کی جا رہی ہے۔ انہوں نے مزید کہا کہ چھوٹے کسانوں کو 1500 روپے فی ایکڑ امداد دینے کا بھی فیصلہ کیا گیا ہے۔