ملک بھر میں یوم عاشور عقیدت و احترام سے منایا جا رہا ہے، شہدائے کربلا کو خراجِ عقیدت پیش کرنے کے لیے جلوس اور مجالس جاری

پاکستان بھر میں آج یوم عاشور نہایت عقیدت، احترام اور مذہبی جوش و جذبے کے ساتھ منایا جا رہا ہے۔ حضرت امام حسینؓ اور شہدائے کربلا کی عظیم قربانیوں کو خراجِ عقیدت پیش کرنے کے لیے ملک کے مختلف شہروں میں ماتمی جلوس اور مجالسِ عزا کا انعقاد کیا جا رہا ہے۔

کراچی، لاہور، راولپنڈی، ملتان، پشاور، کوئٹہ، سکھر، حیدرآباد، مظفرآباد سمیت ملک کے چھوٹے بڑے شہروں میں مرکزی جلوس اپنے روایتی راستوں پر رواں دواں ہیں۔ عزادار علم، شبیہ ذوالجناح اور تعزیے کے ہمراہ شہدائے کربلا کی یاد تازہ کر رہے ہیں۔

لاہور میں مرکزی شبیہ ذوالجناح کا جلوس نثار حویلی سے برآمد ہوا، جو اپنے روایتی راستوں سے گزرتے ہوئے کربلا گامے شاہ پہنچ کر اختتام پذیر ہوگا۔ جلوس میں ہزاروں عزادار شریک ہیں جبکہ سکیورٹی ادارے مسلسل نگرانی کر رہے ہیں۔

کراچی میں مرکزی جلوس نشتر پارک سے برآمد ہوگا، جہاں جلوس سے قبل مرکزی مجلسِ عزا منعقد کی جائے گی۔ اسی طرح پشاور میں امام بارگاہ آغا سید علی رضی شاہ سے پہلا جلوس نکالا جائے گا، جس کے بعد مزید متعدد ماتمی جلوس اپنے مقررہ راستوں پر روانہ ہوں گے۔

کوئٹہ میں مرکزی عاشورہ جلوس امام بارگاہ حسینی سادات سید آباد علمدار روڈ سے برآمد ہوگا۔ جلوس کے راستوں پر عزاداروں کے لیے سبیلوں، طبی امدادی کیمپوں اور دیگر سہولیات کا بھی انتظام کیا گیا ہے۔

یوم عاشور کے موقع پر ملک بھر میں سکیورٹی کے غیر معمولی انتظامات کیے گئے ہیں۔ حساس علاقوں میں پولیس، رینجرز اور دیگر قانون نافذ کرنے والے اداروں کی بھاری نفری تعینات ہے جبکہ جلوسوں کے راستوں پر خصوصی چیک پوسٹس قائم کی گئی ہیں۔

انتظامیہ کی جانب سے جلوسوں کے روٹس پر غیر ضروری آمدورفت محدود کر دی گئی ہے، جبکہ بعض حساس علاقوں میں موبائل فون اور انٹرنیٹ سروس پر عارضی پابندی اور دفعہ 144 بھی نافذ کی گئی ہے تاکہ امن و امان کی صورتحال برقرار رکھی جا سکے۔

یوم عاشور کے اختتام پر مختلف شہروں میں شامِ غریباں کی مجالس منعقد ہوں گی، جہاں ذاکرین واقعۂ کربلا کے بعد پیش آنے والے حالات پر روشنی ڈالیں گے اور عزادار امام حسینؓ اور شہدائے کربلا کی لازوال قربانیوں کو خراجِ عقیدت پیش کریں گے۔