محمد رضوان کا این سی سی آئی اے انکوائری میں عدم تعاون، فون کے فرانزک تجزیے پر اہم پیش رفت

لاہور:قومی کرکٹر محمد رضوان کے خلاف این سی سی آئی اے کی جاری انکوائری میں اہم پیش رفت سامنے آئی ہے۔ ذرائع کے مطابق محمد رضوان تفتیش میں مکمل تعاون نہیں کر رہے اور ادارے کی جانب سے موبائل فون کے فرانزک ڈیپ اینالیسس کے لیے متعدد بار رابطے کے باوجود فون فراہم کرنے کے معاملے میں تاخیر ہوئی ہے۔

ذرائع کا کہنا ہے کہ تفتیش کو حتمی شکل دینے کے لیے موبائل فون کے اینٹی تھیفٹ اور فیشل ریکگنیشن لاک کھولنا ضروری ہے۔ این سی سی آئی اے مختلف فرانزک ٹولز کے ذریعے فون ان لاک کر سکتی ہے، تاہم اس عمل میں کچھ ڈیٹا متاثر یا ڈیلیٹ ہونے کا خدشہ ہے، جس کے باعث ادارہ رضوان کی موجودگی اور تعاون سے فرانزک تجزیہ کرنا چاہتا ہے۔

ذرائع کے مطابق این سی سی آئی اے 28 ستمبر کو محمد رضوان سے دوبارہ رابطہ کرے گی اور تعاون نہ کرنے کی صورت میں انہیں تحریری نوٹس جاری کرکے قانونی راستہ اختیار کیا جا سکتا ہے۔

ذرائع نے واضح کیا کہ تفتیش مکمل ہونے تک محمد رضوان پر کسی قسم کا الزام عائد نہیں کیا جا رہا۔ این سی سی آئی اے آن لائن بیٹنگ، مبینہ کرپشن اور دیگر ممکنہ کریمنل سرگرمیوں سمیت مختلف پہلوؤں سے تحقیقات کر رہی ہے۔

دوسری جانب کرکٹر امام الحق این سی سی آئی اے کی انکوائری میں تعاون کر رہے ہیں۔ ذرائع کے مطابق امام الحق کے موبائل فون کا فرانزک ڈیپ اینالیسس ان کی موجودگی میں شروع کر دیا گیا ہے اور اسے جلد مکمل کیے جانے کی توقع ہے۔