دانش تیمور کی جذباتی اداکاری پر مداحوں کا طنز، ویڈیو سوشل میڈیا پر وائرل

معروف پاکستانی اداکار دانش تیمور نئے ڈرامے کے ایک جذباتی منظر میں اداکاری کے باعث سوشل میڈیا صارفین کی توجہ کا مرکز بن گئے۔

ڈرامے کی حالیہ قسط میں دانش تیمور کے کردار شاہ داؤد کو اپنے والد دستور علی خان کی موت کی خبر ملتی ہے، جس کے بعد وہ شدید صدمے اور غم کا اظہار کرتے دکھائی دیتے ہیں۔

تاہم یہ جذباتی منظر متعدد ناظرین کو متاثر نہ کرسکا اور سوشل میڈیا صارفین نے دانش تیمور کی اداکاری پر طنزیہ تبصرے کیے۔ بعض صارفین نے ان کے اندازِ اداکاری کو غیر فطری قرار دیتے ہوئے کہا کہ منظر کو زیادہ سادہ انداز میں بھی پیش کیا جاسکتا تھا۔

ایک صارف نے لکھا کہ وہ دانش تیمور کے مداح ہیں، تاہم جذباتی مناظر میں ان کی اداکاری انہیں متاثر نہیں کرتی، جبکہ ایک اور صارف نے تبصرہ کیا کہ سنجیدہ منظر دیکھتے ہوئے بھی انہیں ہنسی آگئی۔

دوسری جانب کچھ سوشل میڈیا صارفین نے اداکار کے چہرے کے تاثرات اور ظاہری شکل پر بھی تبصرے کیے اور قیاس آرائیاں کیں کہ شاید انہوں نے بوٹوکس ٹریٹمنٹ کروایا ہے۔ تاہم اس حوالے سے دانش تیمور کی جانب سے کوئی تصدیق سامنے نہیں آئی۔