پی ٹی آئی لانگ مارچ: اسلام آباد میں سیکیورٹی انتظامات پر کروڑوں روپے کے اخراجات کا تخمینہ

اسلام آباد :پی ٹی آئی کے لانگ مارچ کے پیشِ نظر اسلام آباد میں سیکیورٹی انتظامات پر روزانہ کروڑوں روپے خرچ ہونے کا تخمینہ سامنے آگیا ہے۔ پی ٹی آئی کی جانب سے مارچ 4 اکتوبر تک مؤخر کیے جانے کے باوجود وفاقی دارالحکومت میں کنٹینرز اور اضافی پولیس نفری موجود ہے۔

سیکیورٹی انتظامات کے لیے اسلام آباد میں 1550 کنٹینرز لگائے گئے ہیں، جن کا یومیہ کرایہ 4 کروڑ 65 لاکھ روپے بنتا ہے۔ ایک ہفتے میں کنٹینرز کا کرایہ 32 کروڑ 55 لاکھ جبکہ دو ہفتوں کا خرچ 65 کروڑ 10 لاکھ روپے تک پہنچ سکتا ہے۔

ذرائع کے مطابق اسلام آباد پولیس نے سیکیورٹی انتظامات کے لیے 82 کروڑ روپے مانگے ہیں، جبکہ مجموعی سیکیورٹی اخراجات ایک ارب روپے سے تجاوز کرنے کا امکان ظاہر کیا گیا ہے۔

سیکیورٹی ڈیوٹی کے لیے پنجاب سے 16 ہزار پولیس اہلکار طلب کیے گئے ہیں۔ پنجاب پولیس اہلکاروں کے کھانے پر روزانہ تقریباً 96 لاکھ روپے اور ایک ہفتے میں 6 کروڑ 72 لاکھ روپے خرچ ہونے کا تخمینہ ہے۔ سندھ پولیس کے اہلکاروں کے کھانے پر دو ہفتوں میں تقریباً ایک کروڑ 68 لاکھ روپے خرچ ہونے کا بتایا گیا ہے۔

اس کے علاوہ سیکیورٹی انتظامات کے لیے 70 کوسٹرز اور 30 ڈبل کیبن گاڑیاں بھی کرائے پر حاصل کی گئی ہیں۔ 70 کوسٹرز کا یومیہ کرایہ 10 لاکھ 50 ہزار روپے جبکہ 30 ڈبل کیبن گاڑیوں کا یومیہ کرایہ 3 لاکھ روپے بتایا گیا ہے۔

یوں لانگ مارچ مؤخر ہونے کے باوجود سیکیورٹی انتظامات برقرار رہنے سے سرکاری اخراجات میں مزید اضافے کا امکان ہے۔