معرکۂ حق قومی اتحاد کی علامت، پاکستان ہر چیلنج کیلئے تیار: فیلڈ مارشل عاصم منیر

(راولپنڈی) فیلڈ مارشل سید عاصم منیرکی زیر صدارت 275ویں کور کمانڈرز کانفرنس کا انعقاد ہوا، جس میں قومی سلامتی، علاقائی صورتحال اور انسداد دہشتگردی آپریشنز کا تفصیلی جائزہ لیا گیا۔

کانفرنس کے دوران فورم نے مسلح افواج، قانون نافذ کرنے والے اداروں اور وطن کے دفاع میں جانوں کا نذرانہ پیش کرنے والے شہریوں کو زبردست خراجِ عقیدت پیش کیا اور اس عزم کا اعادہ کیا کہ شہداء کی قربانیاں پاکستان کی سلامتی، اتحاد اور استحکام کی بنیاد ہیں۔

آرمی چیف نے پاک افواج کی پیشہ ورانہ مہارت، تیاری اور جنگی صلاحیتوں پر مکمل اطمینان کا اظہار کرتے ہوئے انٹیلی جنس بنیادوں پر جاری آپریشنز میں کمانڈرز کی کارکردگی کو سراہا۔ انہوں نے ہدایت دی کہ دہشتگرد نیٹ ورکس کے مکمل خاتمے اور ان کے سہولت کاروں کے خلاف کارروائیاں اسی رفتار سے جاری رکھی جائیں۔

فورم نے واضح کیا کہ افغان سرزمین سے دہشتگرد عناصر کی موجودگی اور ان کی معاونت علاقائی امن کیلئے خطرہ ہے، جبکہ پاکستان پر لگائے گئے الزامات کو بے بنیاد اور گمراہ کن قرار دیا گیا۔

کانفرنس میں علاقائی کشیدگی سے بچاؤ، تحمل اور ذمہ داری کے مظاہرے پر زور دیا گیا، جبکہ اس بات کا اعادہ کیا گیا کہ خطے میں پائیدار امن باہمی احترام اور خودمختاری کے اصولوں سے ہی ممکن ہے۔

فیلڈ مارشل عاصم منیر نے “معرکۂ حق” کو قومی اتحاد، اجتماعی عزم اور خودمختاری کے دفاع کی علامت قرار دیتے ہوئے کہا کہ یہ عوام، حکومت اور افواج کے درمیان غیر متزلزل ہم آہنگی کی عکاسی کرتا ہے، جو ہر قسم کے اندرونی و بیرونی خطرات کے مقابلے کیلئے تیار ہے۔

فورم نے مقبوضہ جموں و کشمیر میں انسانی حقوق کی خلاف ورزیوں کی شدید مذمت کرتے ہوئے کشمیری عوام کی سیاسی، سفارتی اور اخلاقی حمایت جاری رکھنے کے عزم کا اعادہ کیا۔

کانفرنس کے اختتام پر آرمی چیف نے کمانڈرز کو ہدایت کی کہ بدلتی ہوئی جیو پولیٹیکل صورتحال کے پیش نظر اعلیٰ سطح کی آپریشنل تیاری برقرار رکھی جائے اور ہر ممکن خطرے سے نمٹنے کیلئے پیشگی اقدامات کیے جائیں۔