ملک بھر میں 9 محرم الحرام کے جلوس برآمد، سکیورٹی ہائی الرٹ، کئی شہروں میں موبائل سروس جزوی معطل

(اسلام آباد) شہدائے کربلا کی عظیم قربانیوں کو خراجِ عقیدت پیش کرنے کے لیے ملک بھر میں 9 محرم الحرام کے ماتمی جلوس برآمد ہونا شروع ہوگئے ہیں۔ جلوسوں اور مجالسِ عزا کے موقع پر سکیورٹی کے غیر معمولی انتظامات کیے گئے ہیں جبکہ کئی شہروں میں موبائل فون سروس جزوی طور پر معطل اور خصوصی ٹریفک پلان نافذ کر دیا گیا ہے۔

پولیس، رینجرز اور دیگر قانون نافذ کرنے والے اداروں کے اضافی اہلکار جلوسوں کے راستوں اور حساس مقامات پر تعینات ہیں۔ داخلی و خارجی راستوں کی کڑی نگرانی کی جا رہی ہے جبکہ واک تھرو گیٹس، سی سی ٹی وی کیمروں اور جدید نگرانی کے نظام سے سکیورٹی کو یقینی بنایا جا رہا ہے۔

لاہور میں مرکزی جلوس برآمد

لاہور میں نویں محرم الحرام کا مرکزی جلوس پانڈو سٹریٹ اسلام پورہ سے برآمد ہوگیا۔ جلوس اپنے روایتی راستوں سے گزرتا ہوا امام بارگاہ خیمہ سادات پہنچے گا جہاں مجلس عزا اور نماز مغربین کے بعد دوبارہ روانہ ہو کر اپنے اختتامی مقام پانڈو سٹریٹ پر اختتام پذیر ہوگا۔

اسلام آباد میں سکیورٹی کے سخت انتظامات

وفاقی دارالحکومت اسلام آباد میں 9 محرم کا مرکزی جلوس امام بارگاہ جی سکس اثنا عشریٰ سے برآمد ہوگا۔ انتظامیہ نے جلوس کے روٹس کو مکمل طور پر بند کر دیا ہے جبکہ سکیورٹی ادارے ہائی الرٹ ہیں۔

کراچی میں مرکزی جلوس آج دوپہر ایک بجے

کراچی میں 9 محرم الحرام کا مرکزی جلوس نشتر پارک سے دوپہر ایک بجے برآمد ہوگا۔ اس سے قبل مرکزی مجلس عزا منعقد ہوگی۔ جلوس اپنے روایتی راستوں سے ہوتا ہوا کھارادر میں حسینیہ ایرانیاں امام بارگاہ پر اختتام پذیر ہوگا۔ اس دوران ایم اے جناح روڈ سمیت مختلف شاہراہوں پر ٹریفک کی آمدورفت متاثر رہے گی۔

حیدرآباد، ملتان اور پشاور میں بھی جلوس جاری

حیدرآباد میں مرکزی جلوس لطیف آباد نمبر 5 سے برآمد ہوگیا جبکہ ملتان میں مرکزی ماتمی جلوس امام بارگاہ ممتاز آباد سے نکالا جائے گا۔ پشاور میں حسینیہ ہال صدر سے مرکزی جلوس برآمد ہوچکا ہے اور شہر میں 10 ہزار سے زائد پولیس اہلکار سکیورٹی کے فرائض انجام دے رہے ہیں۔

کوئٹہ میں موبائل سروس بند

کوئٹہ میں شبیہ ذوالجناح کا مرکزی جلوس امام بارگاہ ناصر العزاء سے برآمد ہوگا۔ انتظامیہ نے شہر میں موبائل فون سروس معطل کر دی ہے جبکہ جلوس کے راستوں سے ملحقہ گلیوں اور سڑکوں کو کنٹینرز لگا کر سیل کر دیا گیا ہے۔ روٹ پر واقع مارکیٹیں اور دکانیں بھی بند رکھی گئی ہیں۔

حکام نے شہریوں سے اپیل کی ہے کہ جلوسوں کے دوران جاری ٹریفک پلان پر عمل کریں، سکیورٹی اداروں سے تعاون کریں اور غیر ضروری سفر سے گریز کریں تاکہ عزاداری کے اجتماعات پرامن اور محفوظ ماحول میں منعقد ہو سکیں۔