مسلمان متحد ہوں تو ہر چیلنج کا مقابلہ کر سکتے ہیں، ایرانی وزیر خارجہ

ایران کے وزیر خارجہ سید عباس عراقچی نے مسلم دنیا کے اتحاد، خود انحصاری اور باہمی تعاون پر زور دیتے ہوئے کہا ہے کہ مسلمان متحد ہو کر کھڑے ہوں تو بیرونی عناصر کی جانب سے درپیش ہر چیلنج کا ڈٹ کر مقابلہ کر سکتے ہیں۔

سماجی رابطے کی ویب سائٹ ایکس پر اپنے بیان میں عباس عراقچی نے کہا کہ ایرانی مسلح افواج نے دنیا کی مہنگی ترین فوجی طاقت کے سامنے اپنی تیاری، صلاحیت اور قوت کا مظاہرہ کیا ہے۔

ایرانی وزیر خارجہ کا کہنا تھا کہ اب وقت آگیا ہے کہ مسلمان صرف دوسروں پر انحصار کرنے کے بجائے اپنی صلاحیتوں پر بھروسہ کریں اور متحد ہوں۔ انہوں نے مسلم ممالک کے درمیان باہمی تعاون اور خود انحصاری کو وقت کی اہم ضرورت قرار دیا۔

ایرانی فوج کی دفاعی صلاحیت میں اضافے کا دعویٰ

دوسری جانب ایرانی فوج کے ترجمان بریگیڈیئر جنرل محمد اکرمینیا نے کہا ہے کہ ایرانی فوج نے حالیہ برسوں کے دوران اپنی دفاعی اور جنگی صلاحیت میں نمایاں اضافہ کیا ہے اور وہ کسی بھی ممکنہ خطرے سے نمٹنے کے لیے مکمل طور پر تیار ہے۔

انہوں نے کہا کہ جنگی تیاری صرف نئے ہتھیاروں کی فراہمی تک محدود نہیں بلکہ موجودہ دفاعی نظام کی بحالی، جدید کاری، نئے آلات کی شمولیت، مقامی صلاحیتوں کے فروغ اور فوجی اہلکاروں کے حوصلے بلند رکھنے سمیت متعدد اقدامات پر مشتمل ہے۔

بریگیڈیئر جنرل اکرمینیا کے مطابق موجودہ حالات میں جنگی صلاحیت کا ایک اہم حصہ پرانے یا متاثرہ دفاعی نظام کی مرمت اور جدید خطوط پر استوار کرنے سے متعلق ہے۔ ایرانی فوج اپنی انجینئرنگ اور تکنیکی مہارت کے ذریعے دفاعی سازوسامان کی ازسرنو تیاری اور اپ گریڈیشن کا عمل جاری رکھے ہوئے ہے۔

### فضائی دفاع اہم ترجیح قرار

ایرانی فوج کے ترجمان نے فضائی دفاع کو ملکی دفاعی حکمت عملی کی اہم ترین ترجیحات میں شامل قرار دیتے ہوئے کہا کہ پیچیدہ علاقائی صورتحال اور مختلف نوعیت کے خطرات کے پیش نظر فضائی دفاع ملکی فضائی حدود اور اہم تنصیبات کے تحفظ میں فیصلہ کن کردار ادا کرتا ہے۔

انہوں نے مزید کہا کہ فوج کی حقیقی طاقت صرف جدید اسلحے میں نہیں بلکہ اہلکاروں کے ایمان، نظم و ضبط، ذہنی تیاری اور بلند حوصلے میں بھی ہوتی ہے۔

ایرانی ترجمان کے مطابق ایرانی فوج ماضی کی جنگوں میں مقامی صلاحیتوں اور مؤثر منصوبہ بندی کے ذریعے اپنی دفاعی استعداد ثابت کرچکی ہے اور مستقبل کے خطرات کو مدنظر رکھتے ہوئے جنگی تیاری اور دفاعی صلاحیت میں مسلسل اضافہ کر رہی ہے۔