شمالی وزیرستان میں سکیورٹی فورسز کی بڑی کارروائیاں، مزید 21 دہشت گرد ہلاک

سکیورٹی فورسز نے خیبرپختونخوا کے ضلع شمالی وزیرستان میں انٹیلی جنس معلومات کی بنیاد پر کامیاب کارروائیاں کرتے ہوئے مزید 21 دہشت گردوں کو ہلاک کر دیا، جبکہ چار اہم سرغنہ بھی مارے گئے ہیں۔

پاک فوج کے شعبۂ تعلقاتِ عامہ (آئی ایس پی آر) کے مطابق سکیورٹی فورسز نے میران شاہ اور گرد و نواح میں خوارج کے متعدد ٹھکانوں کو نشانہ بنایا۔ گزشتہ 72 گھنٹوں کے دوران ہونے والی شدید جھڑپوں میں بھارت کے حمایت یافتہ فتنہ الخوارج سے تعلق رکھنے والے مزید 21 دہشت گرد ہلاک ہوئے، جن میں چار اہم کمانڈر خالد رضا عرف سالار، مفتون، موسیٰ اور عمران عرف ایان شامل ہیں۔

آئی ایس پی آر کے بیان کے مطابق ہلاک ہونے والے یہ سرغنہ سکیورٹی فورسز کے اہلکاروں اور معصوم شہریوں کے قتل سمیت متعدد دہشت گرد کارروائیوں میں مطلوب تھے۔ حالیہ کامیاب کارروائیوں کے بعد گزشتہ 72 گھنٹوں میں ہلاک ہونے والے دہشت گردوں کی مجموعی تعداد 48 تک پہنچ گئی ہے، جس سے علاقے میں سرگرم دہشت گرد نیٹ ورک کو بڑا دھچکا پہنچا ہے۔

بیان میں مزید کہا گیا کہ ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا ہے۔ یہ عناصر مختلف دہشت گرد حملوں اور بے گناہ شہریوں کے قتل میں ملوث رہے ہیں۔

آئی ایس پی آر کے مطابق علاقے میں باقی ماندہ دہشت گرد عناصر کے خاتمے کے لیے کلیئرنس اور سرچ آپریشنز بدستور جاری رہیں گے۔ قومی ایکشن پلان کے تحت "عزمِ استحکام" وژن کے مطابق سکیورٹی فورسز اور قانون نافذ کرنے والے ادارے ملک سے دہشت گردی کے مکمل خاتمے کے لیے اپنی کارروائیاں پوری قوت کے ساتھ جاری رکھے ہوئے ہیں۔

دریں اثنا، صدرِ مملکت آصف علی زرداری نے شمالی وزیرستان میں کامیاب کارروائیوں پر سکیورٹی فورسز کو خراجِ تحسین پیش کرتے ہوئے کہا کہ دہشت گردی کے نیٹ ورک کے اہم سرغنوں کا خاتمہ قومی سلامتی کے لیے ایک اہم کامیابی ہے۔ ان کا کہنا تھا کہ پوری قوم اپنی بہادر سکیورٹی فورسز کے شانہ بشانہ کھڑی ہے۔

وزیراعظم محمد شہباز شریف نے بھی کارروائیوں کو سراہتے ہوئے کہا کہ "عزمِ استحکام" کے وژن کے تحت سکیورٹی فورسز دہشت گردی کے خلاف نمایاں کامیابیاں حاصل کر رہی ہیں، اور ملک سے دہشت گردی کے مکمل خاتمے تک یہ جدوجہد جاری رہے گی۔