پاکستان کا نفرت انگیزی کے خاتمے کیلئے عالمی برادری کے ساتھ مل کر کام کرنے کے عزم کا اعادہ

(نیو یارک )پاکستان نے عالمی سطح پر نفرت انگیزی، تعصب اور امتیازی رویوں کے خاتمے کے لیے بین الاقوامی برادری کے ساتھ مل کر کام کرنے کے عزم کا اعادہ کیا ہے۔

اقوام متحدہ میں پاکستان کے مستقل مندوب عاصم افتخار نے نفرت انگیز تقاریر کے انسداد سے متعلق ایک تقریب سے خطاب کرتے ہوئے کہا کہ نفرت انگیز بیانیے اور تعصب پر مبنی تقاریر دنیا بھر میں سماجی ہم آہنگی اور امن کے لیے سنگین خطرہ بنتی جا رہی ہیں۔

انہوں نے اقوام متحدہ کی جانب سے نفرت انگیز تقاریر کے تدارک کے لیے تجویز کردہ اقدامات پر مکمل اور مؤثر عملدرآمد کی ضرورت پر زور دیتے ہوئے کہا کہ تمام رکن ممالک کو اس حوالے سے مشترکہ حکمت عملی اپنانا ہوگی۔

عاصم افتخار نے کہا کہ اسلاموفوبیا دنیا کے بعض معاشروں میں امتیازی سلوک، سماجی محرومی اور عدم مساوات کو مزید گہرا کر رہا ہے، جس کے باعث مسلم کمیونٹیز کو مختلف چیلنجز کا سامنا ہے۔

انہوں نے مطالبہ کیا کہ اسلاموفوبیا کے انسداد کے لیے اقوام متحدہ کے مجوزہ لائحہ عمل کو جلد از جلد حتمی شکل دی جائے تاکہ مذہبی منافرت، تعصب اور امتیازی رویوں کے خلاف مؤثر اقدامات ممکن بنائے جا سکیں۔

پاکستانی مندوب کا کہنا تھا کہ بین المذاہب ہم آہنگی، رواداری اور باہمی احترام کے فروغ کے ذریعے ہی ایک پرامن اور مستحکم عالمی معاشرے کی تشکیل ممکن ہے۔ انہوں نے اس عزم کا اظہار کیا کہ پاکستان نفرت انگیزی اور تعصب کے خاتمے کے لیے عالمی کوششوں میں اپنا فعال کردار جاری رکھے گا۔

تقریب کے شرکاء نے بھی اس بات پر زور دیا کہ نفرت انگیز تقاریر اور مذہبی تعصب کے خلاف اجتماعی اقدامات وقت کی اہم ضرورت ہیں تاکہ عالمی سطح پر امن، برداشت اور سماجی ہم آہنگی کو فروغ دیا جا سکے۔