فیلڈ مارشل عاصم منیر سے ایرانی صدر مسعود پزشکیان کی ملاقات، علاقائی استحکام میں پاکستان کے کردار کی تعریف

(اسلام آباد) فیلڈ مارشل سید عاصم منیر سے ایران کے صدر ڈاکٹر مسعود پزشکیان نے اہم ملاقات کی، جس میں علاقائی صورتحال، امن و استحکام، کشیدگی میں کمی اور باہمی دلچسپی کے مختلف امور پر تفصیلی تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران ایرانی صدر نے خطے میں امن کے فروغ، مذاکرات کے ذریعے تنازعات کے حل اور کشیدگی کم کرنے کے لیے پاکستان کے تعمیری اور ذمہ دارانہ کردار کو سراہا۔ انہوں نے مختلف فریقین کے درمیان افہام و تفہیم کو فروغ دینے کے لیے پاکستان کی سفارتی کوششوں کی بھی تعریف کی۔

آئی ایس پی آر کے مطابق فیلڈ مارشل سید عاصم منیر نے اس موقع پر خطے میں امن، استحکام اور پرامن بقائے باہمی کے لیے پاکستان کے غیر متزلزل عزم کا اعادہ کیا۔ انہوں نے کہا کہ پاکستان خطے میں امن و سلامتی کے قیام کے لیے اپنی کوششیں جاری رکھے گا۔

ملاقات میں دونوں رہنماؤں نے پاکستان اور ایران کے درمیان برادرانہ تعلقات کو مزید مضبوط بنانے، باہمی تعاون بڑھانے اور مشترکہ دلچسپی کے امور پر قریبی مشاورت کا سلسلہ جاری رکھنے کے عزم کا بھی اظہار کیا۔

آئی ایس پی آر کے مطابق ملاقات خوشگوار ماحول میں ہوئی اور دونوں ممالک کے درمیان دوطرفہ تعلقات کو نئی جہت دینے کے امکانات پر بھی تبادلہ خیال کیا گیا۔