کیلیفورنیا کے گورنر گیون نیوسم نے ایران تنازع پر صدر ڈونلڈ ٹرمپ کو کڑی تنقید کا نشانہ بناتے ہوئے جنگ ختم کرنے کا مطالبہ کیا،

(کیلیفورنیا )اپنے بیان میں گیون نیوسم کا کہنا تھا کہ ایران کے ساتھ جاری تنازع نہ صرف غیر ضروری ہے بلکہ اس کے منفی اثرات براہ راست امریکی عوام پر پڑ رہے ہیں۔ انہوں نے دعویٰ کیا کہ ملک میں اشیائے ضروریہ کی قیمتوں میں غیر معمولی اضافہ اور گیس کی بڑھتی ہوئی قیمتیں صدر ٹرمپ کی پالیسیوں کا نتیجہ ہیں۔

گورنر نے مزید کہا کہ موجودہ حالات میں جنگی حکمت عملی کے بجائے سفارتی راستہ اختیار کرنا وقت کی اہم ضرورت ہے تاکہ عوام کو مزید معاشی بوجھ سے بچایا جا سکے۔

دوسری جانب امریکی سینیٹر ٹیمی بالڈون نے بھی صدر کے جنگی اختیارات کو محدود کرنے کے لیے قرارداد پیش کرتے ہوئے کہا کہ جنگ سے سوائے مہنگائی، انسانی جانوں کے نقصان اور خاندانوں کی جدائی کے کچھ حاصل نہیں ہوا۔

سیاسی تجزیہ کاروں کے مطابق ان بیانات کے بعد امریکا میں ایران پالیسی پر نئی بحث شروع ہوگئی ہے اور آنے والے دنوں میں اس معاملے پر مزید اختلافات سامنے آنے کا امکان ہے۔