27 ستمبر سے پہلے آنکھیں کھول لیں، ورنہ حالات سنبھالنا مشکل ہوگا: سہیل آفریدی

پشاور: وزیراعلیٰ خیبرپختونخوا محمد سہیل آفریدی نے حکمرانوں اور فیصلہ سازوں کو خبردار کیا ہے کہ وہ 27 ستمبر سے پہلے آنکھیں کھولیں اور ملک کو انصاف، آئین اور قانون کی بالادستی کی جانب لے جائیں، بصورت دیگر حالات کو سنبھالنا مشکل ہو جائے گا۔

سپریم کورٹ کے باہر دھرنے میں شرکت کے موقع پر میڈیا سے گفتگو کرتے ہوئے سہیل آفریدی نے کہا کہ عمران خان کی صحت سے متعلق تشویش ناک خبریں سامنے آ رہی ہیں اور قوم کو ان کی صحت کے حوالے سے شدید تحفظات ہیں۔

انہوں نے کہا کہ نہ وہ عمران خان کی صحت پر سیاست کرتے ہیں اور نہ ہی عمران خان نے اپنی صحت کے حوالے سے کبھی ایسی کوئی بات کی ہے جس کا مقصد کسی قسم کا ریلیف حاصل کرنا ہو۔ ان کے مطابق عمران خان کی صحت کے معاملے کو سنجیدگی سے لیتے ہوئے اخلاقی جرات کا مظاہرہ کیا جائے اور خاندان کی موجودگی میں ذاتی معالجین کی زیر نگرانی علاج کا مطالبہ پورا کیا جائے۔

’عمران خان کو جعلی مقدمات میں ناحق قید کیا گیا‘

وزیراعلیٰ خیبرپختونخوا نے الزام عائد کیا کہ عمران خان کو جعلی مقدمات میں ناحق قید کیا گیا ہے، جبکہ ان کے مخالفین بدعنوانی کے مقدمات میں ملوث رہے، کرپشن کی اور ملک و قوم کا پیسہ لوٹا۔

سہیل آفریدی نے کہا کہ ظلم کرنے والے یہ بات اچھی طرح سمجھ لیں کہ مکافاتِ عمل سے کوئی نہیں بچ سکتا اور انہیں اپنے کیے کا حساب دینا ہوگا۔

ججز سے انصاف کی امیدیں وابستہ ہیں: سہیل آفریدی

انہوں نے کہا کہ ملک میں انصاف کا نظام اس وقت شدید آزمائش سے دوچار ہے۔ اگر ایک جج انصاف کے لیے اسٹینڈ لے گا تو اس سے دیگر ججز کو بھی حوصلہ اور ہمت ملے گی۔

ان کا کہنا تھا کہ عوام ججز سے امیدیں لگائے بیٹھے ہیں، اگر ججز انصاف نہیں کریں گے اور جس کام کی تنخواہیں لیتے ہیں وہ انجام نہیں دیں گے تو عوام انصاف کے لیے کہاں جائیں گے۔

’نوجوانوں کی آنکھوں میں انقلاب کی چمک دیکھ رہا ہوں‘

سہیل آفریدی نے کہا کہ آج نوجوانوں کی آنکھوں میں انقلاب کی جو چمک نظر آ رہی ہے، اسے کوئی سنبھال نہیں پائے گا۔

انہوں نے خبردار کیا کہ اگر ظلم اور ناانصافی کا سلسلہ جاری رہا اور نفرت اسی طرح بڑھتی گئی تو حالات اس نہج تک پہنچ سکتے ہیں کہ عمران خان کے کہنے پر بھی لوگوں کے دلوں میں محبت پیدا نہیں ہوگی۔

وزیراعلیٰ نے حکمرانوں اور فیصلہ ساز طبقے پر زور دیا کہ وہ صورتحال کی سنگینی کو سمجھیں، 27 ستمبر سے پہلے اقدامات کریں اور ملک کو انصاف، آئین اور قانون کی بالادستی کی طرف لے جائیں، بصورت دیگر حالات کو سنبھالنا مشکل ہو جائے گا۔

نواز شریف کے بیرون ملک علاج کا حوالہ

محمد سہیل آفریدی نے کہا کہ عمران خان نے اپنے دور حکومت میں نواز شریف کو علاج کے لیے بیرون ملک جانے کی اجازت دی تھی، حالانکہ نواز شریف کے خلاف مبینہ جعلی میڈیکل سرٹیفکیٹس کے حوالے سے بھی سوالات اٹھائے گئے تھے۔

ان کے مطابق عمران خان ان معاملات سے آگاہ تھے، تاہم انہوں نے انسانی ہمدردی کے تقاضوں کو مدنظر رکھتے ہوئے نواز شریف کو بیرون ملک علاج کے لیے جانے کی اجازت دی۔

سہیل آفریدی نے کہا کہ آج عمران خان کو بنیادی انسانی حقوق اور انصاف سے محروم رکھا جا رہا ہے، جو انتہائی تشویش ناک اور ناقابل قبول ہے۔