امریکی رکنِ کانگریس کا وزیراعظم شہباز شریف اور فیلڈ مارشل عاصم منیر کو خراجِ تحسین

(واشنگٹن ڈی سی ) امریکا اور ایران کے درمیان جنگ بندی اور مذاکراتی عمل میں پاکستان کے کلیدی سفارتی کردار کو عالمی سطح پر پذیرائی مل رہی ہے، جبکہ امریکی سیاسی حلقوں نے بھی پاکستان کی سیاسی و عسکری قیادت کی کوششوں کو اہم قرار دیا ہے۔

خط میں کانگریشنل پاکستان کاکس کی جانب سے پاکستان کی سیاسی اور عسکری قیادت کے لیے مخلصانہ تشکر اور دیرپا قدردانی کا اظہار کیا گیا۔

کانگریشنل پاکستان کاکس کے شریک چیئرمین جیک برگمین نے اپنے خط میں کہا کہ پاکستان کی جانب سے امریکا اور ایران کو مذاکرات کی میز پر لانا حقیقی ریاستی بصیرت اور ذمہ دار سفارت کاری کا مظہر ہے۔

انہوں نے کہا کہ جاری امن مذاکرات میں پاکستانی سیاسی و عسکری قیادت کی رہنمائی اور مثبت کردار قابلِ ستائش ہے اور اس سلسلے میں وہ دلی طور پر مشکور ہیں۔

جیک برگمین نے اس بات پر بھی زور دیا کہ پاکستان اور امریکا کے تعلقات دیرپا اسٹریٹجک اہمیت کے حامل ہیں، جبکہ وائٹ ہاؤس اور امریکی کانگریس بھی پاکستان کے منفرد اور مثبت سفارتی کردار کا عوامی سطح پر اعتراف کر چکے ہیں۔

خط میں امریکی رکنِ کانگریس نے اعلان کیا کہ وہ پاک امریکا اسٹریٹجک تعلقات کو مزید مضبوط بنانے کے لیے جلد پاکستان کا دورہ بھی کریں گے۔

تجزیہ کاروں کے مطابق پاکستان کی حالیہ سفارتی سرگرمیوں نے نہ صرف خطے میں کشیدگی کم کرنے میں اہم کردار ادا کیا بلکہ عالمی سطح پر بھی پاکستان کے مثبت اور متوازن تشخص کو اجاگر کیا ہے۔