ڈی جی آئی ایس پی آر کی سمر انٹرن شپ 2026 میں طلبہ سے خصوصی نشست، قومی سلامتی اور ذمہ دارانہ سوشل میڈیا استعمال پر گفتگو

راولپنڈی: پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل نے سمر انٹرن شپ 2026 کے شرکاء طلبہ و طالبات کے ساتھ خصوصی نشست میں قومی سلامتی، دہشت گردی، غلط معلومات کے تدارک اور سوشل میڈیا کے ذمہ دارانہ استعمال سمیت مختلف اہم قومی امور پر تفصیلی گفتگو کی۔

آئی ایس پی آر کے مطابق خصوصی سیشن کے دوران ڈی جی آئی ایس پی آر نے طلبہ کے سوالات کے مدلل، جامع اور تفصیلی جوابات دیے اور قومی سلامتی سے متعلق مختلف پہلوؤں پر اپنا مؤقف پیش کیا۔

سمر انٹرن شپ میں شریک طلبہ و طالبات کا کہنا تھا کہ سیشن میں مس انفارمیشن، ڈس انفارمیشن، پروپیگنڈا اور غیر مصدقہ خبروں سے بچاؤ کے حوالے سے مؤثر رہنمائی فراہم کی گئی۔ شرکاء کے مطابق اس جامع گفتگو سے قومی سلامتی سے متعلق کئی غلط فہمیاں اور ابہام دور ہوئے۔

شرکاء نے بتایا کہ آزاد جموں و کشمیر کی صورتحال، بھارتی پروپیگنڈے اور پاکستان کے مؤقف پر دی گئی تفصیلی بریفنگ نے زمینی حقائق کو بہتر انداز میں سمجھنے میں مدد فراہم کی۔ ان کا کہنا تھا کہ فتنہ الہندوستان اور فتنہ الخوارج سے متعلق پیش کیے گئے مؤقف نے بھی مختلف سوالات کے جواب دیے۔

سمر انٹرن شپ 2026 کے شرکاء نے اس موقع پر درست معلومات کے فروغ، ذمہ دارانہ طرزِ عمل اختیار کرنے اور ملک دشمن پروپیگنڈے کا مؤثر انداز میں مقابلہ کرنے کے عزم کا اظہار کیا۔

واضح رہے کہ آئی ایس پی آر کی سمر انٹرن شپ 2026 میں پاکستان بھر کے 21 مختلف اسٹیشنز پر 6 ہزار سے زائد طلبہ و طالبات شریک ہیں، جہاں انہیں قومی اداروں، دفاعی امور اور مختلف پیشہ ورانہ شعبوں سے متعلق آگاہی فراہم کی جا رہی ہے۔