ایران معاہدے کے لیے تیار، اسرائیلی حملے کم کرانے میں کردار ادا کیا: ٹرمپ

(واشنگٹن) امریکی صدر ڈونلڈ ٹرمپ نے دعویٰ کیا ہے کہ ایران جاری مذاکرات میں بڑی رعایتیں دینے کے لیے تیار ہے، جبکہ انہوں نے ایران کے خلاف اسرائیلی فوجی کارروائیوں میں کمی لانے کے لیے بھی اہم کردار ادا کیا۔

اسرائیلی چینل 12 کو دیے گئے انٹرویو میں ٹرمپ نے کہا کہ مشرقِ وسطیٰ کے پانچ مختلف ممالک نے ان سے رابطہ کر کے اسرائیلی وزیراعظم بنیامن نیتن یاہو پر دباؤ ڈالنے کی درخواست کی تھی تاکہ ایران کے خلاف حملے روکے جا سکیں۔

ٹرمپ کے مطابق انہوں نے نیتن یاہو کو واضح پیغام دیا کہ وہ کسی نئی جنگ کے حامی نہیں اور اسرائیل کو ایران کے خلاف وسیع جنگ کے لیے امریکی حمایت کا گرین سگنل نہیں دے سکتے۔ انہوں نے یہ بھی کہا کہ نیتن یاہو کو باور کرایا گیا کہ اگر جنگ کا دائرہ وسیع ہوا تو اسرائیل خود کو تنہا پا سکتا ہے۔

امریکی صدر نے بتایا کہ خطے کے کئی ممالک تہران اور واشنگٹن کے درمیان جاری سفارتی مذاکرات کے حامی ہیں اور کشیدگی میں اضافے کے بجائے سیاسی حل چاہتے ہیں۔

دوسری جانب امریکی اور اسرائیلی میڈیا رپورٹس کے مطابق ایران نے بھی بالواسطہ پیغامات کے ذریعے حملے روکنے کی آمادگی ظاہر کی ہے، بشرطیکہ اسرائیل بھی اپنی فوجی کارروائیاں بند کرے۔

ٹرمپ نے زور دیا کہ حالیہ کشیدگی کے بعد تمام فریقوں کو سفارت کاری کی جانب واپس آنا چاہیے تاکہ امریکا اور ایران کے درمیان جاری مذاکرات کو حتمی شکل دی جا سکے۔

ایک ٹیلی فونک ریلی سے خطاب کرتے ہوئے صدر ٹرمپ نے یہ پیش گوئی بھی کی کہ امریکا آئندہ دو ہفتوں کے اندر ایران کے معاملے میں "مکمل فتح" کا اعلان کر سکتا ہے۔ ان کا کہنا تھا کہ ایرانی مذاکرات کار متعدد اہم مطالبات تسلیم کرنے پر آمادہ ہیں اور کسی ممکنہ معاہدے کی صورت میں عالمی منڈی میں تیل کی قیمتوں میں نمایاں کمی آ سکتی ہے۔

تاہم مبصرین کا کہنا ہے کہ اگرچہ ٹرمپ گزشتہ کئی ماہ سے ایران کے ساتھ تنازع کے جلد خاتمے کی پیش گوئیاں کرتے رہے ہیں، لیکن ابھی تک یہ واضح نہیں کہ دونوں ممالک کے درمیان مذاکرات کس مرحلے میں ہیں اور کسی حتمی معاہدے کے امکانات کتنے قریب ہیں۔