ٹرمپ اور نیتن یاہو کے درمیان ایران معاہدے پر مشاورت، جوہری پروگرام محدود کرنے پر زور

صدر ڈونلڈ ٹرمپ اور اسرائیلی وزیراعظم بنیامین نیتن یاہو کے درمیان اہم ٹیلیفونک رابطہ ہوا جس میں ایران کے ساتھ زیر غور مفاہمتی یادداشت اور جاری مذاکراتی عمل پر تفصیلی تبادلہ خیال کیا گیا۔

اسرائیلی وزیراعظم کے دفتر کی جانب سے جاری بیان کے مطابق دونوں رہنماؤں نے ایران سے متعلق سفارتی پیش رفت اور ممکنہ معاہدے کے مختلف پہلوؤں پر گفتگو کی۔ بیان میں کہا گیا کہ اگرچہ اسرائیل اس مفاہمتی یادداشت کا براہِ راست فریق نہیں، تاہم وزیراعظم نیتن یاہو نے صدر ٹرمپ کے اس عزم کو سراہا کہ کسی بھی حتمی معاہدے میں ایران کے جوہری پروگرام سے متعلق سخت اور مؤثر اقدامات شامل کیے جائیں گے۔

سوشل میڈیا پلیٹ فارم ایکس پر جاری بیان کے مطابق صدر ٹرمپ نے اس بات کا اعادہ کیا کہ مجوزہ معاہدے کے تحت ایران کی افزودہ یورینیم کا مکمل خاتمہ یقینی بنایا جائے گا، جبکہ یورینیم افزودگی کی بنیادی تنصیبات کو غیر فعال کرنے کے اقدامات بھی شامل ہوں گے۔

بیان میں مزید کہا گیا کہ ایران کی میزائل سازی کی صلاحیت کو محدود کرنے اور خطے میں اس کے اتحادی گروہوں کی حمایت کے خاتمے سے متعلق نکات بھی معاہدے کا حصہ بن سکتے ہیں۔

دونوں رہنماؤں نے خطے کی سلامتی اور استحکام کے حوالے سے قریبی رابطے برقرار رکھنے پر اتفاق کیا، جبکہ ایران سے متعلق سفارتی عمل پر بھی مشاورت جاری رکھنے کے عزم کا اظہار کیا گیا۔