ایران نے پانچ تجارتی جہازوں پر حملہ کیا، ہرمز ناکہ بندی پر مکمل عملدرآمد جاری ہے: جنرل ڈین کین

(واشنگٹن) امریکی جنرل ڈین کین نے دعویٰ کیا ہے کہ ایران نے پانچ تجارتی جہازوں پر حملہ کیا ہے جبکہ امریکا آبنائے ہرمز کی مکمل ناکہ بندی پر ہر سطح پر عملدرآمد جاری رکھے ہوئے ہے۔

امریکی جنرل کے مطابق ایران کے خلاف جاری کشیدگی کو آج 55 واں دن ہو چکا ہے اور خطے میں بحری نگرانی مزید سخت کر دی گئی ہے۔

جنرل ڈین کین نے کہا کہ قبضے میں لیے گئے ایرانی بحری جہاز "ٹو سکا" کا تمام عملہ محفوظ ہے اور امریکی فورسز صورتحال پر مکمل کنٹرول رکھے ہوئے ہیں۔

انہوں نے بتایا کہ امریکا نے دو ایسے جہاز بھی قبضے میں لیے ہیں جو ایرانی بندرگاہوں سے روانہ ہوئے تھے، جبکہ بحرالکاہل اور بحرہند میں بھی ایرانی جہازوں کے خلاف کارروائیاں جاری رکھی جائیں گی۔

جنرل ڈین کین کا کہنا تھا کہ امریکی انٹیلی جنس مختلف ذرائع سے معلومات اکٹھی کرتی ہے اور ایران کے بارے میں مکمل آگاہی رکھتی ہے۔ انہوں نے کہا کہ ایران کی عسکری صلاحیت، ہتھیار، صنعتی اور معاشی نظام سمیت تمام اہم پہلوؤں پر امریکا کو مکمل معلومات حاصل ہیں۔

انہوں نے مزید کہا کہ امریکی ادارے ایرانی رہنماؤں کے بارے میں بھی مکمل معلومات رکھتے ہیں، ان کی سرگرمیوں، طرز زندگی اور فیصلوں سے متعلق تمام صورتحال پر نظر رکھی جا رہی ہے۔

جنرل ڈین کین کے اس بیان کو ایران امریکا کشیدگی میں مزید شدت کی علامت قرار دیا جا رہا ہے جبکہ خطے میں سفارتی کوششیں بھی جاری ہیں۔